მზია ამაღლობელის საქმეზე ირაკლი დგებუაძე გამოიკითხა

ბათუმის საქალაქო სასამართლოში მზია ამაღლობელის საქმის მთავარი მოწმე, ბათუმის პოლიციის უფროსი, ირაკლი დგებუაძე გამოიკითხა. პოლიციის მაღალჩინოსანს ადვოკატების გარდა კითხვები დაუსვა თავად ბრალდებულმაც. მზია ამაღლობელმა ირაკლი დგებუაძეს სთხოვა, გაეხსენებინა, რა ხდებოდა 11 იანვრის საღამოს პოლიციის იმ განყოფილებაში, სადაც ახლადდაკავებული მზია ჰყავდათ. ჟურნალისტმა პოლიციის მაღალჩინოსანს შეახსენა, რომ ის დაკავებულს ფიზიკურ და სიტყვიერ შეურაცხყოფას აყენებდა - აგინებდა, აფურთხებდა და თანამშრომლებს არ აძლევდა მისთვის წყლის მიწოდების საშუალებას. ირაკლი დგებუაძემ სასამართლო პროცესზე ეს ბრალდებები უარყო და განაცხადა, რომ მას მზია ამაღლობელთან დაკავშირებით თანამშრომლებისთვის არანაირი მითითება არ მიუცია. გამოკითხვის შემდეგ, პოლიციის მაღალჩინოსანმა სასამართლო დარბაზი საპროტესტო შეძახილების ფონზე დატოვა.