"ASALA"nı Kim Bitirdi: AZƏRBAYCANLI AGENT, YOXSA ABDULLAH ÇATLI? - GİZLİ TARİX

Kanal Bəxtiyar Əlirzayevə məxsusdur. *** Bu cür materialların davamlı olmağını istəyirsinizsə, kanala abunə olmağı və videolarımızı bəyənməyi unutmayın. Diqqətiniz bizim üçün çox önəmlidir. Milli İstihbarat Təşkilatında, qısaca MİT-də çalışmış və qurumun ikinci adamı səviyyəsinə yüksəlmiş Hiram Abbas Güney Azərbaycandan Türkiyəyə köçən ailənin övladı olub. Mason olduğu iddia edilən babası yəhudilikdəki Hiram əfsanəsindən, Süleyman məbədinin memarı Hiram Abifdən təsirlənərək ona bu adı verib. 1982-ci ilin avqustunda ASALA-nın Ankara “Əsənboğa” hava limanında 9 nəfərin ölümü, 72 nəfərin yaralanması ilə nəticələnən terror aktından sonra dövlət qərar verir ki, artıq bunlara qarşı ciddi tədbir görülməlidir. Kənan Evrenin təlimatı ilə bu məqsədlə özəl bir komitə yaradılır. Evrenin MİT-də çalışan qızı ilə kürəkəni Şenay Gürvit və Erkan Gürvitin də daxil olduğu komitə ASALA-ya qarşı Avropada və Orta Şərqdə əməliyyatlar keçirmək üçün 3 qrup formalaşdırır: Avropada əməliyyatlar aparacaq qruplardan birinə Abdullah Çatlı, digərinə Sabah Ketene başçılıq edir, ASALA-nın baş qərargahının yerləşdiyi Beyrutdakı əməliyyatlar isə Hiram Abbasa tapşırılır. Çatlı o vaxt Türkiyədə axtarışda idi və Fransada yaşayırdı. Sabah Ketene kərküklü türkmən idi və bölgəni çox yaxşı tanıdığı, ərəbcə mükəmməl bildiyi üçün MİT-lə əməkdaşlığa cəlb olunmuşdu. Hiram Abbas isə həmin vaxt MİT-dən ayrılmışdı və təqaüddə idi. Əməliyyatlar haqqında detallı məlumatlar olmasa da, Çatlının qrupunun Fransada Altforville qəsəbəsindəki “erməni soyqırımı” abidəsini partlatdığı və ermənilərin toplantı keçirəcəyi salona bomba yerləşdirdiyi məlumdur. Bomba sonradan zərərsizləşdirilmişdi. MİT-in Antiterror idarəsinin rəisi olmuş Mehmet Eymür sonradan verdiyi açıqlamalarda Çatlının rolunun həddən artıq şişirdildiyini və əsl işi Beyrutda Hiram Abbasın qrupunun həyata keçirdiyini söyləyir. Beyrutdakı əməliyyatlara İsrail də kömək edib. 1982-ci ilin əvəllərində Aralıq dənizi vasitəsilə Suriyaya sızmağa çalışan “Mossad” agentlərinin şişmə botu, yəni qayığı xarab olur və Türkiyə sahillərinə – İskəndərun istiqamətinə sürüklənir. Bu zaman Türkiyə sahil mühafizə xidmətinin gəmisi onları görür və xilas edir. İsrail bunun əvəzində Türkiyəyə təklif edir ki, Beyrutda ASALA-ya qarşı əməliyyatlar keçirməyinizə yardım edə bilərik. İsrail o vaxt Beyrutdakı fələstinli qruplara qarşı mübarizə aparırdı. Hiram Abbasın qrupu şəhərin şərq hissəsində, Zahle adlanan yerdə ASALA-ya qarşı əməliyyatlar keçirir, təşkilatın bir çox lideri öldürülür. ASALA-nın arxivi - üzvlərin siyahısı, maliyyə qaynaqları, kimlərdən yardım alındığı barədə sənədlər isə “Mossad”ın əlinə keçir, “Mossad” bu məlumatların hamısını olmasa da, bir qismini Türkiyəyə verir. Bundan başqa, Hiram Abbas Beyrutda yaşayan Türkiyə kökənli Əl Zein ailəsi ilə əlaqə yaradır və onların köməyindən də yararlanır. Hiram Abbas uğurlu əməliyyatlardan sonra təkrar MİT-ə dönür. “Kurtlar Vadisi”ndəki “Aslan Akbey” obrazı Hiram Abbasın, “Doğu bəy” isə Hiram Abbasın MİT-də çalışmağa başladığı ilk vaxtlarda çox yaxın olduğu general Fuad Doğunun prototipidir. Qəribədir ki, ASALA-nın yox edilməsində adı çəkilən hər 3 şəxs müəmmalı şəkildə öldürülüb. Hiram Abbas 1990-cı ilin sentyabrında evdən çıxıb, ofisə gedərkən yolda bələdiyyə işçisi geyimində olan 2 nəfərin çarpaz atəşi ilə qətlə yetirilir. O artıq təqaüdə çıxmışdı və ABŞ silah şirkətlərinin Türkiyə təmsilçisi idi. Qətli DEV-SOL öz üzərinə götürsə də, bununla bağlı hər hansı sübut yoxdur. Sonralar “Ergenekon” məsələsi ilə bağlı istintaq materiallarında onu Tarık Ümit adlı MİT əməkdaşının öldürdüyü əksini tapır. “Kurtlar vadisi”ndəki “Pala” personajı isə Tarık Ümitin prototipidir. Ümit silah və narkotik qaçaqmalçılığı ilə məşğul olan trabzonlu kabadayı Dündar Kılıçın, Kurtlar vadisindəki “Laz Ziya”nın ortağı olub. Ələddin Çakıcı, həmin filmdəki “Çakır” isə Dündar Kılıçın qızı ilə evli olub, ayrıldıqdan sonra qadını güllələtdirib. Abdullah Çatlı isə1996-cı ildə Türkiyənin Susurluq ərazisində qəzaya düşüb həyatını itirir. Qəzanın planlı şəkildə törədilməsi, Çatlının niyə öldürülməsi ilə bağlı çox sayda versiyalar var. O hadisədən sonra məşhur Susurluk qalmaqalı başladı və baş nazir Məsud Yılmazın göstərişi ilə Başbakanlık Təftiş Kurulu başkanı Kutlu Savaş “dərin dövlət”, dövlət-mafiya əlaqələri haqqında raport hazırladı. ASALA-ya qarşı əməliyyatlara cəlb olunmuş digər şəxs – Sabah Ketene isə 2006-cı ildə İraqın şimalında PKK tərəfindən öldürüldü...