مامۆستا عبداللطيف أحمد مصطفى به‌رنامه‌ی له‌گه‌ڵ ڕه‌نج Lagal Ranj Rudaw ، DR. Abdullatif Ahmad

بەرنامەی لەگەڵ رەنج بەرنامەی لەگەڵ رەنج تایبەت بوو بە قسەکردن لەسەر کارەکانی داعش لە روانگەی حیزبە ئیسلامییەکان و رەوتە سەلەفییەکانی کوردستانەوە. لەمیانی بەشداریکردنی لە بەرنامەی لەگەڵ رەنج-ی تەلەڤزیۆنی رووداو، د.عومەر محەممەد، ئەندامی مەکتەبی سیاسی یەکگرتووی ئیسلامی کوردستان رایگەیاند "داعش هێزێکی تووندوتیژ و تۆقێنەرە لە ناوچەکە". گوتیشی: "داعش لە لایەنی سیاسییەوە هێزێکی گەورەیان لە پشتە". هەروەها د.عەبدوللەتیف لەبارەی گرووپی دەوڵەتی ئیسلامی رایگەیاند "ئەوەی داعش دەیکات فتوحات نییە، نە بەرامبەر ئێمەی موسڵمان و نە بەرامبەر ئێزدییەکان، ئەوان خەڵکانێکن حاڵی نەبوون لە ئایینی خودا". گوتیشی "ئەبوبەکر بەغدادی پیاوێکی زێدەڕەوو تووندڕەوە و لە خودا ناترسێت". سەبارەت بەو پەروەردەیەی کە داعش لەسەری کار دەکات، د.عەبدوللەتیف رایگەیاند "داعش پەروەردەی قوتابخانەی ئەو گرووپ و حیزبە ئیسلامییانەن کە کاریگەرن بە کتێبەکانی سەید قوتب"، دەشڵێت "داعش بەرهەمی بە سیاسیکردنی ئیسلامە". سەبارەت بە ئەرکی پێشمەرگە د.عەبدولـلەتیف رایگەیاند "پێشمەرگە پارێزگاری لە خاک و ماڵ و نامووس و کەرامەت و خوێنی ئەم میللەتە بکات بە ئیمانەوە، شەهیدە". هاوکات یاسین تەها، قوتابی ماستەر لەسەر رەوتە ئایینییەکان پێیوابوو "سعودیە گەورەترین بەرهەمهێنەری تیرۆرە و گەورەترین بەرهەڵستکاری تیرۆرە"، دەشڵێت "ئەگەر لەرووی مەنتیقەوە داعش راست بێت، ئەوا حیزبە ئیسلامییەکان یان دەبێت هەڵبوەشێنەوە، یان دەبێت بچنەوە ماڵەوە دابنیشن. بۆیە ئەرکی حیزبە ئیسلامییەکانە رووبەڕووی داعش ببنەوە لەرووی فیکرییەوە". رووداو- هەولێر