Lazarat, Policia hyn në pronat e Mahmutajt, sekuestron gëzhojat dhe 10 mijë bimë kanabis

Lazarat - Forcat më të zgjedhura të Policisë së Shtetit kanë arritur të hyjnë sot në orën 12:30, në mes të zjarrit të armëve, në pronat e Gate Mahmutajt në Lazarat, të dyshuarit kryesor që qëlloi me armë policinë dhe protagonisti i sotshëm i ngjarjes së Lazaratit. Policia njoftoi se aty u gjetën, gëzhojat e armëve, me të cilat u qëllua kundër Policisë si dhe 7 parcela me 10 mijë bimë narkotike kanabis sativa e 1000 kubikë, të cilët u asgjesuan. Mahmutaj, në tentativën e tij për t'i fshehur provat, Policisë dhe shmangur arrestimit, i kishte vënë zjarrin 6 fuçive me marijuanë si dhe sasive të tjera të paketuara ose jo. Policia i ka mbledhur të gjitha provat për t'i dërguar ato në Prokurori. Policia e Shtetit, e mbështetur edhe nga 500 forca të saj, kryesisht forca speciale, ka tentuar të hyjë që gjatë mbrëmjes së djeshme në Lazarat, por është pritur me armë. Emrat e 26 personave, të identifikuar tashmë prej saj, janë publikuar gjatë gjithë ditës së sotme në të gjitha mediat si personat që kanë qëlluar deri edhe me armë të rënda kundër policisë. Më shumë vizitoni: http://www.oranews.tv/