Ushshaq Muqami Suzuk Nosxisi | Ushshak Mukam HD Version

سۈزۈك مۇقاملارنىڭ يەتتىنچىسى كەلدى ئەمسە. ئۇششاق مۇقامى ئالدىنقى 30 يىلدا سەھنىگە ئەڭ كۆپ ئېلىپ چىقىلغان مۇقامدۇر. بولۇپمۇ يارىم ساقى ۋە جۇلا قىسمى تىلىۋىزىيە ئىستانسىسىنىڭ ھەر يىللىق ھېيتلىق ياكى باشقا كېچىلىكلىرىدە بەك كۆپ قېتىم ناخشا ئۇسۇللىرى بىلەن ئورۇندىلىپ چىققاچمىكىن، مېنىڭ بەزى دوستلىرىم ھەتتا ئۇششاق مۇقامىنىڭ يارىم ساقى ۋە جۇلا قىسمىنى ئۇيغۇر 12 مۇقامنىڭ ھەممىسى شۇ ئوخشايدۇ دەپ ئويلىۋاپتىكەن. ئۇلارغا مۇقاملارنى تولۇق بىر قېتىم ئاڭلاش ئۈچۈنلا كېمىدە 20 سائەت كېتىدىغانلىقىنى، 12 مۇقامدا ئۇششاق جۇلادەك ئاھاڭلاردىن 400 گە يېقىنى بارلىقىنى چۈشەندۈرۈشكە خېلى كۆپ كۈچ سەرپ قىلغانتىم. بۇنداق ئەھۋال كىلىپ چىقىشتىكى سەۋەب، 12 مۇقاملارنىڭ دۋد، س د پىلاستىنكىلىرىنى چىقارغاندىن باشقا، مۇقام ئانسانبىللىرى، تىلىۋىزىيە ئىستانسىلىرى مۇقاملارنى كەڭ خەلققە ئومۇملاشتۇرۇشتا، مەيلى قانداق سەۋەپ بولۇشتىن قەتئىينەزەر، قاتتىق مەغلۇپ بولغان. سەھنىدە قاچانلا قارىسا، بىر بولسا چەببىيات جۇلاسى، ئۇ بولمىسا، ئۇششاق جۇلاسى. خۇددى ئۇيغۇر مۇقاملىرىدا باشقا ناخشا-ئاھاڭلار يوقتەكلا. ھەتتا ئۆزھال جۇلاسىنىمۇ خەلق ئاممىسى مۇقام ئانسانبىلى ئورۇندىغىنى بىلەن ئەمەس، بەلكى ئابدۇللانىڭ بۇزۇپراق ئوقۇغان نوسخىسى ئارقىلىق بىلىشىدۇ. مەكتەپلەردىمۇ مۇزىكا دەرسىدە مۇقام ئۈگىتىدىغان ئىش يوق، 12 مۇقامنىڭ ئىسىملىرىنى ئوقۇغۇچىلارغا يادلىتىپلا بولدى قىلىشىدۇ. ئەمدى ئۇششاق مۇقامىنىڭ فىلىمىغا كەلسەك، بۇ فىلىمدە ناھايىتى گۈزەل بىر ھىكايە بايان قىلىنغان. بۇرۇنقى ئۇيغۇر خانلىقلىرىنىڭ بېرىدە، مەلۇم بىر چالغۇ بىلەن ناخشا-ئۇسۇلدىن باشقىنى ئۈگەتمەيدىغان مەدرىس بولغان ئىكەن. مەدرىستە قىز-ئوغۇل ئارىلاش 20-30 بالا ئوقۇيدىكەن. بۇنىڭ ئىچىدە مۇدەررىسنىڭ قىزىمۇ باركەن. ئوقۇغۇچىلارنىڭ ئىچىدە يەنە مۇدەررىس بېقىۋالغان يەنە بىر كەپسىز راۋاپچى بالا باركەن. راۋاپچى بالا بىلەن مۇدەررىسنىڭ گۈزەل قىزى كىچىكىدىن باشلاپ بىللە ئۆسۈپ چوڭ بوپتۇ. بالاغەتكە يەتكەندە بولسا ئۇلارنىڭ قەلبىگە ئۆز-ئارا مۇھەببەت رىشتىنى ساپتۇ. شۇنداق بىر كۈنلەردە خاندىن يارلىق چۈشۈپ، راۋاپچى يىگىتنى ئوردىغا ماھارەت كۆرسىتىشكە تەكلىپ قىلىپتۇ. يىگىت ئۇستازى، ساۋاقداشلىرى ۋە مەشۇغى بىلەن خوشلىشىپ خان ئوردىسىغا بېرىپتۇ ۋە كامالەتكە يەتكەن راۋاپ ماھارىتى بىلەن ھەممەيلەننى قايىل قىلىپتۇ. پادىشاھ ئۇنى ئۆزىنىڭ يالغۇز قىزى ۋە ۋەزىرلەرنىڭ بەگزادە، خانقىزلىرىغا مۇزىكا ئوقۇتقۇچى قىلىپ تەيىنلەپتۇ. دەرس ئۆتۈش جەريانىدا، بۇ گۈزەل، خۇشخۇي مەلىكىمۇ بۇ راۋاپچى يىگىتكە كۆيۈپ قاپتۇ. بۇ ئىشتىن خەۋەر تاپقان پادىشاھ بولسا يىگىتنى ھەر يەرلەردە ئۆز يېنىغا تارتىپ، كاتتا ئىلتىپاتلارنى كۆرسىتىپتۇ. پادىشاھنىڭ يىگىتنى كىيئوغۇل، تەختىگە ۋارىس قىلماقچى بولۇش نىيىتى بەكلا ئېنىق ئىكەن. بۇ ئامەتلىك راۋاپچى يىگىت زادى قانداق قىلىدۇ؟ گۈزەل مەلىكە، شاھ تەختىنى تاللامدۇ، ياكى. ..؟ ئەگەر ھىكايىنىڭ داۋامىغا قىزىقساڭلار، ئەمسە ئۇششاق مۇقامىغا مەرھەمەت. Timecodes: 00:00 - Muqeddime 02:40 - Te'ezze  14:27 - Nosxe 22:04 - Yarim Saqi we Julasi 26:13 - Kichik Seleqisi 32:42 - Dastan_1 40:41 - Dastan_2 45:32 - Dastan_3 49:50 - Dastan_4 54:12 - Dastan_5 58:44 - Meshrep