【🚀 未來機場城市就業新機遇！「東涌專道」2028通車 8分鐘到機場大嶼山&新界西北居民齊得益。唯機鐵要本地化吸客保持競爭力？】

未來機場城市，有巨型商場、一個大紅館一倍但相等於啟德主場一半大約坐到兩萬人嘅中形演唱場館，好多時紅館又唔夠大啟德又大得滯，我哋好需要一個咁樣嘅場地，又有度假酒店，超多嘢。我都幾肯定要請好多人嚟呢個區域做嘢。 今日北大嶼居民搭東涌線要再搭巴士兜曬成個東涌先去到機場，區內居民已經嘈咗好耐，有啲仲要搭去青衣返轉頭，離晒譜咁，搞到去機場返工嘅意欲唔高。我喺2017年做新界西立法會議員，睇埋東涌嘅時候，已經要求做一條專線俾北大嶼居民好方便咁經東涌線去機場返工，當時機管局同我講話2028年可以做好，今日竟然完全冇撻Q，仲係28年做好，我都不得不讚一讚機管局！ 呢條「機場東涌專道」8分鐘就可以喺東涌站去到機場城市，跟住行去機場大樓及亞博一二期，中途仲會經民航處、國泰城呢幾大僱主，肯定就大受歡迎。如果大部份人可以喺呢個區返工，將來東涌綫朝早出市區就可以多好多Capacity。咁我就希望「洪前鐵路」去到洪水橋，可以駁返落去欣澳，變咗「洪欣鐵路」，做住先，等「洪港鐵路」可以分成「洪欣」同「欣港」兩截，到時就可以喺欣澳轉東涌綫出市區同轉荃灣綫，所以呢樣嘢對將來成個新界西北都好大影響。 不過今日香港站出發去東涌收$25，轉呢條專道行多五分鐘就到機場大樓，而直達嘅機鐵要收$120，乘客量已經一路跌緊，港鐵方面對呢條專道冇意見咩？定係佢地都諗緊既然機鐵都做唔到客量，不如大幅降價去搶番A巴嘅客去機場，將佢本地化呢？ 至於呢個東莞空港中心我就梗係大力支持啦，如果可以再做大啲，多啲貨櫃行水路，就肯定少咗貨櫃車行陸路入香港，尤其係屯門市中心、皇珠路、屯門公路唔使日日塞到爆。所以我係好想你哋做大啲。政府話嚟緊會加10倍嘅貨量，咁究竟係加好多船？定係換好多快船去做到100萬噸呢個目標呢？ 機管局嘅楊總監就話「東涌專道」喺設計嘅過程一路同地鐵公司有聯繫，佢哋一路都知，亦都冇反對。至於呢條專道嘅收費方面會做到同其他公共交通工具有好強嘅競爭力。咁我就追問係咪即係幾蚊雞？楊總監就笑笑口咁「嗯」咗一聲 而至於點解東莞空港中心點解可以增大10倍咁巴閉，機管局商務總監就話因為塊地大咗好多，仲連接住個碼頭，又增加好多快船，處理貨物嘅效率可以大大提升。 聽到兩位咁講就真係正啦！到時唔單只係東涌居民，連新界西北居民都有着數，有條「洪欣鐵路」大家就可以喺洪水橋落到去欣澳轉東涌綫出市區，唔使逼死屯馬線。另外，多咗貨物行水路，自然就少咗貨車經屯門。真係鐵路、馬路都可以鬆一鬆，呢兩個項目唔單止要支持，仲要全力令佢做快啲。唯一就係港鐵真係要諗吓之後點樣可以將機鐵本地化，搶番啲生意保持競爭力啦！