Bandat e Elbasanit, debat për tunelet dhe frikën e policisë

Emisioni "Studio e Hapur" nga Eni Vasili ne News24 26 shtator, 2017 Drejtori për Hetimin e Krimit të Organizuar, Idajet Faskaj ka qenë sot në emisionin Studio e Hapur në News24 për të folur mbi ngjarjen e Elbasanit. Në debat e sipër me gazetarin Artan Hoxha, Faskaj rrëfeu pa dashje se një prej drejtuesve të policisë në Elbasan ishte përplasur më parë me bandën e Suel Çelës, por më pas u largua nga ky qytet. Bëhet fjalë për ish zv.drejtorin e policisë së Elbasanit, Shkëlqim Pepkolaj, që u transferua nga Elbasani për në Shkodër disa muaj më parë. I gjendur përballë një pohimi të tillë, gazetari Artan Hoxha ka shpërthyer në akuza. “Nuk duhej të largohej Shkëlqim Pepkolaj nga Elbasani. Ai duhet të qëndronte aty. Nga Elbasani duhej të largohej banda” është shprehur gazetari Artan Hoxha, duke lënë pa fjalë zyrtarin e policisë së Shtetit, që pa dashje pranoi një skandal që ka ndodhur në Elbasan, dëshmi e mbështetjes së politikës ndaj krimit në këtë qytet. Shkëlqim Pepkolaj u largua nga Elbasani gjatë kohës që Fatmir Xhafaj ishte ministër i Brendshëm, në fund të mandatit të qeverisë “Rama 1”. Sot Fatmir Xhafaj është sërish ministër, por ende nuk ka folur për sulmin që iu bë policisë në Elbasan.