燃油車信仰崩塌！新車遇冷、二手車跌至白菜價無人要，形成致命死循環。二手車商收一架蝕幾萬。面對新車指導價跳樓，傳統燃油車生態已無力回天，行業洗牌正在慘烈上演。#二手車 #汽車 #豪車 #油車

燃油車價格血崩！？二手豪車跌至「白菜價」! 車商：賣一部蝕一部，成個市場嘅信仰冧曬檔，波子都冇面畀。 以前嗰啲BBA大戶呢，而家企喺展廳望住個價牌，直頭心都離一離。奧迪A6L官方劈價劈到10萬5，裸車直插26萬，擺到成個死城咁，人影都冇只啊。路虎極光仲得人驚，直接玩腰斬，由42萬插到22萬，連問價嘅阿叔都唔多個。平治E仔最慘情，月銷由萬四架插到七千，創咗歷史最大跌幅，幾乎系對半開。曾經喺神州大地橫行霸道三十年嘅BBA，而家將個價位㩒喺地板度磨擦，都換唔到消費者一個回眸。外國車廠發夢都估唔到，自己苦心經營幾十年嘅金漆招牌，一夜之間畀人拆骨煎皮，碎到一地都系。 啱啱出爐嘅四月份成年會銷量榜，成個乘用車零售銷量頭十名，九架系新能源，一架系燃油車，而唯一嗰架油車竟然仲要系國產貨。 新車市場已經慘烈成咁，二手嗰邊直頭系災難級，價格崩到車商睇到都擰頭，連車都唔敢收。點解以前啲人當系保值神器嘅油車，而家冇人肯接盤呢？你去望下而家個二手市場就知，風向已經轉曬。以前嗰啲要加價爭崩頭嘅日系神車、德系豪車，而家車商一見即彈，直接擰頭唔收。呢個情況直接搞到好似平治E300、雅閣呢啲昔日保值王，二手殘值跌到阿媽都唔認得。新車落地價硬生生唔見咗一大截，閒閒地縮水幾萬甚至十幾萬。燃油車市場突然上演呢場大龍鳳，真正嘅矛盾根本唔系乜嘢油電之爭。今日同大家拆解三大問題：點解以前車商爭住收嘅燃油車，而家變咗辣手山芋呀？二手油車價大跌，因為新能源太強，定系燃油車自己玩死自己呢？對於普通人嚟講呢，而家趁低吸納二手油車，定系轉投電車陣營先至系明智之選？ 二手油車行情結冰，本質系因為佢喺老百姓心目中已經完全失去咗流通性。以前我哋買車，潛意識都當佢系一個大件家當。今日俾二十萬蚊提架新車，心入面盤算住揸三年仲可以甩手賣返十四萬，嘩，呢啲咪叫資產堅挺，進退自如囉。但系而家呢套邏輯已經玩唔轉，因為後邊嗰條接棒嘅人龍斷咗。睇下城聯會今年嘅數據啦，四月份國內新能源乘用車滲透率歷史性衝破六成一個三大關口。即系而家全國每賣十架新車，有六架都掛住綠牌。真正攞真金白銀買純燃油車嘅人，連四個都湊唔齊。前線新車買家都掉頭擁抱新能源，後邊嘅二手油車市場自然等唔到買家。諗返以前我哋認可嗰啲合資B級老將，好似帕薩特、邁騰、雅閣咁，三年保值率幾咁威風啊，基本穩企五成半至六成嘅高水準。而家？直接碌落到四成八至五成二左右。換句話講呢，就算你買嘅系當年嘅保值標杆，揸夠三年身價縮水四成以上，已經成為殘酷嘅行業現實。但呢個都未算最痛啊，最痛嘅系連產在線面嘅大廠自己都踩住剎車。你睇五月份嘅數據，國內純燃油輕型車產量同比大幅縮水四成半。連車廠老大佬都加速轉身去燃油化，即系條河嘅源頭都慢慢收緊。源頭減產，新車遇冷，二手冇人接，形成一個流通閉環斷纜。你話呢個時候車商點敢貿然揼十幾萬去收油車？邊個敢？ 咁到底邊個搞到二手油車商咁頭痕？好多人覺得肯定系賣電車嘅同行搶曬啲客，我個人認為呢個只系講中一半。真正令到二手車商嗌曬救命嘅，其實系隔離賣新油車嘅傳統4S店。大家仔細諗下個商業邏輯，二手車商收車靠賺中間差價，最怕乜嘢？最怕架車仲未甩到手，隔籬新車就突然跳樓式降價。而家新車指導價時不時玩大跳水，對二手生態嚟講簡直系降維打擊。以前加價先有得攞車嘅神車平治E300，兩年前你行入4S店落地基本要六十萬，仲要拜託個銷售幫手早啲排產。而家？同一部E300配置仲升級埋，落地大概四十三萬搞掂。即系短短兩年，新車身價唔見咗接近十五萬。你諗下二手車商如果半年前跟市價用三十八萬收咗部二手E300，而家睇到新車只賣四十三萬，佢部二手點可能仲賣四十萬？根本冇可能啊。個個買車前都會上網格價計數，最後佢只能咬牙蝕本降到三十五萬 甚至更低嚟散貨。收一架車就蝕幾萬，呢啲庫存風險邊個仲敢硬食？唔單止豪華車，普通家用車嘅價格戰仲癲。就講日系標杆雅閣，而家4S店坐低慢慢傾，裸車底價大約做到十三萬二左右。但呢個都未算底，你出去搵嗰啲包牌包稅嘅渠道資源車，直接十一萬七嘅冰點價就攞到新車。新車抵到咁，二手雅閣喺市場仲點標價？ 跟住就有人問呢，4S店點解要咁搏命畀優惠，佢哋唔使賺錢咩？而家好多傳統4S店早已經唔靠賣新車賺大錢。汽車流通協會嘅數據顯示呢，而家4S店嘅利潤核心系靠後端售後保養、機修鈑金、推銷金融套餐嚟維持成個盤數。對4S店老細嚟講呢，賣新車就算賺少啲，甚至蝕少少，只要賣到部車，將個客綁喺自己度，等佢之後三五年都返嚟做保養整車，呢條數長遠睇系返到本。為咗保住售後維修呢個基本盤呢，新車只能不斷用價格換銷量。4S店咁做係為咗自救，但呢套組合拳打落嚟，無意中就令到成個二手油車市場受曬內傷啊。 講完市場同商家，我哋再睇深一層，燃油車保值率大幅下滑，其實系中國汽車工業轉型必經嘅陣痛。大家睇下近排各地推嘅 以舊換新補貼政策，喺實質福利引導下，高達八成一嘅原燃油車用戶換車嗰陣呢，首選都系新能源車。證明大家買車嘅思維已經變咗。點解變啊？最直接原因就系個荷包。平時大家都嗌救命話油費貴，踏入而家二六年，國內95號汽油久唔久就衝上十蚊嘅時代關口，92號都經常喺八蚊樓上徘徊。等我哋計條明賬，一架普通家用燃油車，百公里當佢燒八升油，一年行兩萬公里，淨油錢就要燒差不多萬二蚊。轉電車呢？如果有條件裝叉電樁，或者就算出面全程搵平價時段嘅公共叉電樁，每公里成本頂盡都系一毫子松啲。同樣行兩萬公里，一年電費最多都系兩三千蚊。一年實慳到差不多一萬蚊差價，五年就系五六萬，呢筆數對一般家庭嚟講真系唔講得笑。 而家個市況系點？花十五萬左右預算買部國產電車，人哋可能就畀曬鐳射雷達同高階智駕輔助你，市區代步幫你慳返唔少精神。配合八百伏快充，飲杯咖啡嘅時間，電量就返曬嚟。車廂入面仲有各式各樣嘅舒適配置、智能大屏，靜音仲好過你屋企書房啊。咁可能有人會問，新能源車嘅折舊率唔系更加高咩？我個人認為大家都要客觀咁睇，呢兩年行情正在淨雞雞轉變。嗰啲擁有核心技術、定價權穩固嘅頭部車型，好似特斯拉Model Y，就算你揸咗大半年先放出去，個價依然硬淨，折舊率好低。根據業內最新嘅保值率白皮書，而家主流新能源車嘅三年保值率，已經逐漸穩定喺六成至七成嘅區間，喺某啲細分市場甚至比傳統油車更加硬淨。 講咗咁多，大家系唔系都想換車呢，咪住先，如果你手上有一部舊油車，但你一年根本行唔到幾多公里，例如一年就行嗰三五千公里，純粹周末湊仔去商場，平時買買餸。我勸你千祈唔好因為睇到網上話油車行情見底 要快啲換新能源呢啲帶風向嘅說話，就恐慌性咁急住放車。點解呢？因為你而家去賣，正正撞正車商壓價嘅槍口。你呢部車可能直接唔見幾萬蚊折舊。計條數你聽喇，一年就行幾千公里，換電車就算一滴油都唔使錢，一年盡慳都系兩三千蚊油費，仲未計電車保險貴少少。為咗慳兩三千，去硬蝕幾萬蚊賣車差價，呢條數點計都唔抵。所以呢類低用量車主呢，你部舊油車繼續揸，只要冇大病，揸多一年就賺多一年。 總之，買定離手，心態擺平。車永遠只系服務生活嘅配角，唔好俾部車變成你嘅精神內耗。呢個市道，最緊要系知道自己要乜，計清條數，先至唔會成為大時代入面嘅炮灰啊。