Ош шаарында бир лөлү үй-бүлөсү көрүстөндө жашайт

Лөлү улутундагы Хакимжан Ботиров Ош шаарына жакын жайгашкан айылдардын бириндеги мүрзөдө бир жылдан бери үй бүлөсү менен жашап келет. Анткени башка бараар жайы жок. Бир канча жолу жер тилкесин алуу үчүн жергиликтүү бийликке арыз менен кайрылган. Бирок жыйынтык чыккан эмес. Андыктан аргасыздан ошол эле мүрзөдө кабыр казып иштеп, ай сайын 2 миң сом алат. Алган айлык маянасы 4 баласын багууга да жетпейт. Мүрзөдө жашагандыктан түнкүсүн балдарын сыртка чыгаруудан да коркушат. Ал эми жубайы Кория Умарованын айтымында, ал жерде жашаганга таптакыр шарт жок. "Жада калса кир жууп, балдарымды да жуунта албаймын. Мончого барганча, кирлериди да жууп келем. Анткени мүрзөдө мындай жумуштарды аткарганы болбойт дешет",-дейт ал. Буга чейин Ботировдордун үй-бүлөсүнө жер тилкеси берилээр-берилбеси боюнча тиешелүү жетекчилердер сураганыбызда, жер тилкеси жоктугун билдиришкен. Бул маселеге “Ынтымак” телерадио компаниясы кайра кайрылып, көрүстөндө жашаган үй-бүлөнүн тагдырына дагы кызыктык. Алдыда “Аракет” программабыздан көрө аласыздар.