Yurt obodligi — avvalo mahalladan boshlanadi!

Guliston tumanida yaqinlashib kelayotgan muborak Qurbon hayiti munosabati bilan 23–24-may kunlari barcha mahallalarda keng ko‘lamli umumxalq hasharlari uyushqoqlik va ko‘tarinki kayfiyatda tashkil etilmoqda. Mazkur xayrli tadbirlar doirasida mahallalar, ichki ko‘chalar, ariqlar, qabristonlar hamda muqaddas qadamjolarda obodonlashtirish va tozalash ishlari amalga oshirilmoqda. Hasharlar orqali hududlar yanada fayzli, ozoda va obod maskanga aylantirilib, aholi o‘rtasida hamjihatlik va mehr-oqibat muhiti mustahkamlanmoqda. Xususan, “Ibrat” va “Boyovut” mahallalarida joylashgan qabristonlarda 400 nafarga yaqin fuqarolar faol ishtirok etib, hududlar begona o‘tlardan tozalandi, daraxtlarga shakl berilib, oqlash ishlari bajarildi. Shuningdek, ziyoratgoh va atrof hududlarni tartibga keltirish ishlari ham olib borildi. Ayniqsa, bunday ezgu va savobli hasharlarda nuroniylar, yoshlar, mahalla faollari hamda keng jamoatchilikning bir maqsad yo‘lida birlashgani tadbirlarga o‘zgacha ruh bag‘ishlamoqda. Nafaqat qabristonlarda, balki mahallalardagi ko‘chalar, xonadonlar va jamoat joylarida ham tozalik va obodonlashtirish ishlari yuqori kayfiyatda davom ettirilmoqda. Qurbon hayiti arafasida amalga oshirilayotgan bunday xayrli tashabbuslar xalqimizga xos mehr-oqibat, birdamlik va bag‘rikenglik qadriyatlarini yana bir bor namoyon etmoqda.