Алматыда «Барахолка» базарының саудагерлері бас көтерді

Бүгін Алматыдағы "барахолка" атанып кеткен «Рахат» базарының саудагерлері бас көтерді. Нәпақамызды жиырма жылдан бері осы жерден тауып келеміз деген олар, базардың жабылуына қарсы. Айтуларынша, қаланы Бауыржан Байбек басқарып тұрған кезде Жер комиссиясы «базардың жері зираттың санитарлық қорғау аймағында орналасқан» деген себеппен жалға беру мерзімін ұзартпай тастаған. Бірақ, дәл осы жерді әкімдік жиһаз фабрикасын салу үшін өзге компанияға 5 жылға жылға еш қиындықсыз беріп жіберіпті. Үш жыл бұрын Алматының жер комиссиясы "ТКМ" жауапкершілігі шектеулі серіктесіне қарайтын "Рахат" базарының жерін зираттың жанында орналасқан деп қызыл сызыққа енгізген. Сәйкесінше, бұл жерде базар болмауы керек деген себеппен, жалға беру мерзімін ұзартпай қойған. Бірақ, дәл осы 1 гектар жерді әкімдік көпке созбай астанада тіркелген "Алматы CPS" фирмасына жиһаз фабрикасын салу үшін 5 жылға жалға берген. 2018 жылдан бері «базар жабылуы мүмкін» дегенді естіген саудагерлер, "қайда барып күн көреміз" деген уайыммен жүрміз дейді. ЛӘЗЗАТ ТІЛЕУХАНҚЫЗЫ, Кәсіпкер: – Неліктен 25 базардың қақ ортасында 250 адамды далаға тастай салып, осы жерге жиһаз фабрикасын салу керек. Қалай? Ол не үшін, кімге керек? СЕРІК МОЛДЫБАЕВ, Кәсіпкер: – Қарсымыз, қарапайым халық зардап шегіп отыр мына жерде. Зауыт-фабрикалар жабылып жатыр, сауда орталықтары сенбі-жексенбі істемей жатыр. Енді мынау бұзылса, қайда барамыз біз енді? «Рахат» базарының жартылай құрылтайшысы әрі ондағы кәсіпкерлердің заңды өкілі Жәмиля Төленова әкімдіктің қаулысына қарсы екендіктеріне қатысты арыз-шағым түсіріп келеміз дейді. Бірақ, соттың шешімі арызымызды қанағаттандырусыз қалдыруда деп отыр. Зираттың базардан 350 метр қашықтықта орналасқанын алға тартқан заңгер, бұл мәселені тек аймақтық үйлестіру кеңесі қарауы керек екенін айтады. ЖӘМИЛЯ ТӨЛЕНОВА, «ТКМ» ЖШС заңгері: – Бұл жерде «Алматы CPS»-тің мәселесі РКС-те қаралмаған. Ол жөнінде біз бүкіл құзырлы органдардан жауапты алдық. Ең қызығы назар аударатын жәйт, «Алматы CPS»-тің мәселесі бар болғаны үш-ақ күнде шешіліп отыр. 20 арызды үш минутта қараған жер комиссиясы ол жерде инвестициялық жобаны бекіту туралы шешімді мүлдем қарамаған. Хаттамасында да ол көрсетілмеген. Жер комиссиясы мұндай мәселелерді қарауға құзырлы емес. Жер комиссиясының төрағасы Әзірбаев мырза РКС-тың құрамында жоқ. Әлі де соттасып жатқан екі тараптың тартысына сот нүкте қоймайынша, кәсіпкерлер қалыпты жағдайда өз жұмыстарын жалғастыра береді дейді аудандық әкімдіктегілер. ДАМИР ӘКЕЖАНОВ, Алматы қаласы Жетісу ауданы әкімінің орынбасары: – Екі заңды тұлғаның ортасында сот жүріп жатыр. Екі жыл болды соттың жүріп жатқанына. Бұл жерде ешқандай кәсіпкерді ешкім қуып жатқан жоқ. Бәрі жұмыстарын істеп отыр. Егер керек болса біз оларға айттық, орын бар, барахолканың кез-келген базарында бос орындар бар керек десеңіз. Оқиға орнына Алматы әкімдігінің өкілі Асылбек Сатанов та келіп, жиналғандарға шараның заңсыз екенін ескертіп кетті. Ал жылдар бойы салық төлеп келген кәсіпкерлер, бұл жолы да соттың шешімі еш өзгеріссіз қалдырылса, жоғары сотқа дейін барамыз деп тарқасты. Әйгерім Ердәулет, Ринат Әбілқайыров Бізді әлеуметтік желіде оқыңыздар: Youtube -   / @informburo31kanal   Facebook -   / informburo31   Instagram -   / informburo31   Vkontakte - https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #барахолка #Рахат_базары #кәсіпкерлер_наразылығы