ICC ရှေ့နေချုပ်ရာထူးကနေထုတ်ပယ်ခံရ | People's Spring

ICC ရှေ့နေချုပ် ရာထူးက ထုတ်ပယ်ခံရ ဇူလိုင်လ- ၂၅၊၂၀၂၆ ။People’s Spring အပြည်ပြည်ဆိုင်ရာ ရာဇဝတ်ခုံရုံး (ICC)ရဲ့ အစိုးရရှေ့နေချုပ်ဟာ လိင်ပိုင်းဆိုင်ရာ နှောင့်ယှက်မှုတွေ ကျူးလွန်ကြောင်း စွပ်စွဲချက်တွေကြောင့် ရာထူးကနေ ထုတ်ပယ် ခံလိုက်ရပြီ ဖြစ်ပါတယ်။ ၂၀၂၁ ခုနှစ်မှာ ICCရဲ့ တတိယမြောက် အစိုးရ ရှေ့နေချုပ်အဖြစ် တင်မြှောက် ခံခဲ့ရတဲ့ ဗြိတိန် ဥပဒေရေးရာ ပညာရှင်ဟာ သူကြုံတွေ့ခဲ့တဲ့ စွပ်စွဲချက်တွေကြောင့် ရာထူးတာဝန်တွေကနေ လပေါင်းအတော်ကြာ ဆိုင်းငံ့ခံထားခဲ့ရပါတယ်။ ဇူလိုင် ၂၄ ရက်နေ့မှာတော့ သူ့ကို ထုတ်ပယ်ဖို့ သင့်မသင့် ICCမှာ မဲပေး ဆုံးဖြတ်ခဲ့ပြီး ထောက်ခံမဲ ၈၂ မဲ၊ ကန့်ကွက်မဲ ၁၃ မဲ၊ ကြားနေ ၁၅ မဲဆိုတဲ့ ရလဒ် ထွက်ပေါ်လာခဲ့ပါတယ်။ ဒါကြောင့် သူ့ကို ICCက ထုတ်ပယ်လိုက်တာ ဖြစ်ပါတယ်။ ခန်းဟာ သူ့လက်အောက်မှာ တာဝန်ထမ်းဆောင်ခဲ့တဲ့ ICC ဝန်ထမ်း အမျိုးသမီး တစ်ဦးနဲ့ မသင့်လျော်တဲ့ လိင်ပိုင်းဆိုင်ရာ အနှောင့်အယှက်ပေးမှုတွေ၊ အာဏာအလွဲသုံးစားမှုတွေ ရှိခဲ့ကြောင်း ICCရဲ့ စုံစမ်းစစ်ဆေးရေး ကော်မတီက တွေ့ရှိခဲ့ပါတယ်။ ခန်းဟာ အဲဒီအမျိုးသမီးရဲ့ စွပ်စွဲ ထွက်ဆိုချက်တွေကို တားဆီးဖို့လည်း ကြိုးစားခဲ့တယ်လို့လည်း ဆိုပါတယ်။ ခန်းကတော့ သူ့အပေါ် စွပ်စွဲချက်တွေကို အကြိမ်ကြိမ် ငြင်းဆိုထားပါတယ်။ ခန်းရဲ့ ရှေ့နေကတော့ ခန်းဟာ မျှတမှု ကင်းမဲ့တဲ့ အခြေအနေကို ဖြစ်နိုင်သမျှ ဥပဒေရေးရာ လမ်းကြောင်း အားလုံးကနေ တန်ပြန်သွားမယ်လို့ ပြောပါတယ်။ ရာထူးက ထုတ်ပယ် ခံရပြီးနောက်ပိုင်း ခန်းအနေနဲ့ အမှုအတွက် ဆက်လက်ပြီး တရားရင်ဆိုင်ရဦးမလား ဆိုတာကိုတော့ တိတိကျကျ မသိရသေးပါဘူး။ ခန်းကို စွပ်စွဲခဲ့တဲ့ လက်အောက်ငယ်သား မိန်းကလေးက ခန်းဟာ သူ့ကို ကာလရှည်ကြာ အနှောင့်အယှက် ပေးခဲ့ပြီး လိင်ပိုင်းဆိုင်ရာ အခွင့်အရေးယူတာ၊ မလျော်မကန် ထိကိုင်တာတွေပါ ရှိခဲ့တယ်လို့ ထွက်ဆိုခဲ့ပါတယ်။ ဒါ့အပြင် နယူးယောက်က ဟိုတယ်ခန်း တစ်ခုမှာတော့ ကိုယ်ထိလက်ရောက် စော်ကား တိုက်ခိုက်တဲ့ အခြေအနေထိ ဖြစ်ခဲ့ကြောင်းလည်း ဆိုပါတယ်။ အမျိုးသမီးက တရားရေးအရ စတင် စိန်ခေါ်လာချိန်မှာတော့ ခန်းက ဖိအားပေးပြီး တားဆီးခဲ့တယ်လို့လည်း ဆိုပါတယ်။ ခန်းဟာ သူ့ရဲ့ ICC အစိုးရ ရှေ့နေချုပ် သက်တမ်းအတွင်း ရုရှားသမ္မတ ဗလာဒီမာပူတင်၊ အစ္စရေး ဝန်ကြီးချုပ် ဘင်ဂျမင် နေတန်ညာဟုတို့ကို ICC ဖမ်းဝရမ်းတွေ ထုတ်ဖြစ်အောင် အဓိက တွန်းအားပေးခဲ့ပါတယ်။ ဒါ့အပြင် သူဟာ ၂၀၂၄ နှစ်ကုန်ပိုင်းတုန်းကလည်း ရိုဟင်ဂျာ မျိုးနွယ်စုအပေါ် ကျူးလွန်တဲ့ ရာဇဝတ်မှုတွေအတွက် အာဏာသိမ်း မြန်မာစစ်ခေါင်းဆောင်အပေါ် ဖမ်းဝရမ်း ထုတ်ပေးဖို့ ICCဆီမှာ တင်ပြ တောင်းဆိုခဲ့ပါတယ်။ ===== စပိန်နဲ့ပြင်သစ်မှာ တောမီးဒဏ်ဆိုးဆိုးရွားရွားကြုံတွေ့နေ ဇူလိုင်လ- ၂၅၊၂၀၂၆ ။People’s Spring ပြင်သစ်နဲ့ စပိန်နိုင်ငံတွေမှာ တောမီး လောင်ကျွမ်းမှုတွေကြောင့် လူပေါင်း ၂ သိန်းကျော် အရေးပေါ် ရွှေ့ပြောင်းထားရကြောင်း သိရပါတယ်။ ဇူလိုင် ၂၄ ရက်နေ့မှာ ပြင်သစ် အာဏာပိုင်တွေက ဘောဒိုးစ်မြို့တဝိုက်မှာ နေထိုင်သူ ၆ သောင်းလောက်ကို ရွှေ့ပြောင်းကြဖို့ ညွှန်ကြားခဲ့ပါတယ်။ အခုဆိုရင် ပြင်သစ်နဲ့ အိမ်နီးချင်း စပိန်နိုင်ငံတို့မှာ တောမီးအန္တရာယ်ကြောင့် နေရပ်စွန့်ခွာ ရွှေ့ပြောင်းရသူဟာ ၂ သိန်း ၂ သောင်းကျော် မြင့်တက်လာပါပြီ။ ပြင်သစ် အနောက်တောင်ပိုင်းမှာရှိတဲ့ ဂီယွန်ဒီနဲ့ လန်ဒေးစ် ဒေသတွေမှာလည်း လူ ၂ သိန်း နီးပါးလောက် ရွှေ့ပြောင်းထားရပါတယ်။ ပြင်သစ်မှာတော့ သမ္မတ အီမန်နျူရယ်လ် မာခရွန်က တောမီးနှိမ်နင်းရေး လုပ်ငန်းစဉ်တွေမှာ မီးသတ်နဲ့ ကယ်ဆယ်ရေးတွေ မနိုင်ဝန် ထမ်းနေရတာကြောင့် စစ်တပ်ကိုပါ ဝင်ကူပေးဖို့ ညွှန်ကြားထားပါတယ်။ စပိန် သတင်းဌာနတွေက တောမီးအန္တရာယ်ကို အလွန့်အလွန် ကြီးမားတဲ့အဆင့် XXL တောမီးလို့ ဖော်ပြကြပါတယ်။ ဇူလိုင် ၂၄ ရက်မှာတော့ ဘောဒိုးစ်မြို့နားက မြို့ငယ်လေးခုမှာ နေထိုင်သူတွေကို ပြောင်းရွှေ့ပေးခဲ့ရပါတယ်။ ဂီယွန်ဒီ တောမီးဟာ ဟက်တာပေါင်း ၁၉၀၀၀ လောက်ကို ဝါးမျို ဖျက်ဆီးခဲ့ပြီးဖြစ်သလို အိမ်ခြေ ၈၀ လောက်လည်း မီးလောင် ဆုံးရှုံးခဲ့ပါတယ်။ စပိန်မှာလည်း မက်ဒရစ် မြို့တော်နား ပျံ့နှံ့လောင်ကျွမ်းနေတဲ့ တောမီးသုံးခုဟာ တစ်ခုတည်းအဖြစ် ပေါင်းစည်းပြီး ကြီးထွားလာနေပါတယ်။ စပိန် အစိုးရက သဘာဝ ဘေးအန္တရာယ်ဆိုင်ရာ အရေးပေါ် ကြေညာချက် ထုတ်ပြန်ထားပြီး လူပေါင်း ၂ သောင်းခွဲ လောက်ကို ခြွင်းချက်မရှိ ရွှေ့ပြောင်းဖို့၊ နောက်ထပ် ၄ သောင်းလောက်ကို အတတ်နိုင်ဆုံး အိမ်ထဲမှာပဲ နေကြဖို့ နှိုးဆော်ထားပါတယ်။ မက်ဒရစ်နားက တောမီးဟာ ထိန်းချုပ်ငြှိမ်းသတ်ရခက်တဲ့ အဆင့်ထိ ကျယ်ကျယ်ပြန့်ပြန့် ကူးစက်ပြီး အရှိန်လည်း ပိုကောင်းလာနေတယ်လို့ တာဝန်ရှိသူတွေက ပြောပါတယ်။ ဥရောပမှာ အပူလှိုင်းဖြတ်တဲ့ ဒဏ်ကြောင့် အပူချိန် မြင့်တက်နေတာ၊ လေပြင်းတွေ တိုက်ခတ်နေတာတွေက တောမီးတွေကို အားပေးအားမြှောက်သလို ဖြစ်နေပါတယ်။ မက်ဒရစ်နားက တောမီးတွေကို လောလောဆယ် ဦးချိုးပစ်ဖို့ မဖြစ်နိုင်သေးကြောင်း၊ ဒါကြောင့် မီးကူးစက်မှုတွေကို အတတ်နိုင်ဆုံး တားဆီးမယ့် ကြိုတင် ပြင်ဆင်မှုတွေကို ဦးစားပေး လုပ်ဆောင်နေကြောင်း အရေးပေါ် တုံ့ပြန်ရေး အေဂျင်စီ အရာရှိတွေက ပြောပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA#ICC #ICCProsecutor #InternationalCriminalCourt #BreakingNews #WorldNews #Justice #LegalNews #PeoplesSpring #LatestUpdates #နိုင်ငံတကာသတင်း #ICCရှေ့နေချုပ် #သတင်းစုံ #နောက်ဆုံးရသတင်း #မှုခင်းသတင်း #ပြည်သူ့နွေဦး #ထူးခြားသတင်း #Spain #France #Wildfire #ForestFire #EuropeHeatwave #ClimateChange #BreakingNews #WorldNews #PeoplesSpring #EmergencyUpdates #နိုင်ငံတကာသတင်း #တောမီး #စပိန် #ပြင်သစ် #သတင်းစုံ #နောက်ဆုံးရသတင်း #ရာသီဥတု #ပြည်သူ့နွေဦး #ထူးခြားသတင်း