ဂျော်ဒန်မှာအီရန်လက်ချက်ကြောင့်အမေရိကန်တပ်ဖွဲ့ဝင်တွေအသေအပျောက်ရှိ | People's Spring

ဂျော်ဒန်မှာအီရန်လက်ချက်ကြောင့်အမေရိကန်တပ်ဖွဲ့ဝင်တွေအသေအပျောက်ရှိ ဇူလိုင်လ- ၁၉ ၊၂၀၂၆ ။People’s Spring ဂျော်ဒန်နိုင်ငံ ပိုင်နက်ထဲ အီရန်ရဲ့ တိုက်ခိုက်မှုတွေအတွင်း အမေရိကန် တပ်ဖွဲ့ဝင် ၂ ဦးသေပြီး ၁ ဦးပျောက်ဆုံးနေကြောင်း သိရပါတယ်။ ဇူလိုင် ၁၇ ရက်နေ့က အီရန်ဟာ ဂျော်ဒန်နိုင်ငံထဲမှာ ပဲ့ထိန်းဒုံးနဲ့ ဒရုန်းတွေ ပစ်လွှတ်ပြီး တိုက်ခိုက်ခဲ့တာ ဖြစ်ပါတယ်။ အီရန်က စစ်ဆင်ရေးတွေကို ကွပ်ကဲနေတဲ့ အမေရိကန် ဗဟိုစစ်ဌာနချုပ် (CENTCOM)က အီရန် တိုက်ခိုက်မှုအတွင်း အမေရိကန် တပ်ဖွဲ့ဝင် ၂ ဦးသေ၊ ၁ ဦးပျောက်ဆုံးနေကြောင်း၊ ၄ ဦးကို ဆေးရုံတင်ခဲ့ရပေမယ့် အခုတော့ ဆေးရုံ ပြန်ဆင်းလာပြီဖြစ်ကြောင်း ထုတ်ပြန်ပါတယ်။ နောက်ထပ် ဒဏ်ရာအနည်းအကျဉ်း ရသူတွေကတော့ တာဝန်ပြန်လည် ထမ်းဆောင်နေပြီလို့ CENTCOMက ဆိုပါတယ်။ ဂျော်ဒန်နိုင်ငံရဲ့ ဘယ်နေရာမှာ တိုက်ခိုက်ခံရလို့ အမေရိကန် တပ်ဖွဲ့ဝင်တွေ ထိခိုက်သေဆုံးခဲ့သလဲ ဆိုတာနဲ့ သေဆုံးသူတွေ ဘယ်သူလဲ ဆိုတာကိုတော့ CENTCOMက မထုတ်ပြန်ခဲ့ပါဘူး။ ဇူလိုင် ၁၈ ရက် ညပိုင်းမှာတော့ အမေရိကန် သမ္မတ ဒေါ်နယ်လ်ထရမ့်ရဲ့ ညွှန်ကြားချက်အရ အီရန်ပိုင်နက်ထဲမှာ နောက်ထပ် တိုက်ခိုက်မှုတွေ လုပ်ဆောင်ခဲ့ကြောင်း CENTCOMက အတည်ပြုခဲ့ပါတယ်။ ၈ ညဆက်တိုက်အဖြစ် လုပ်ဆောင်ခဲ့တဲ့ အဲဒီ တိုက်ခိုက်မှုတွေရဲ့ ဟောမုဇ် ရေလက်ကြားမှာ ဖြတ်သန်း ခုတ်မောင်းနေတဲ့ အရပ်ဖက် ရေယာဉ်တွေအပေါ် အီရန်ရဲ့ ရန်ပြုနိုင်စွမ်းကို ထိထိရောက်ရောက် လျှော့ချဖို့ စီစဉ်ထားတာ ဖြစ်တယ်လို့လည်း CENTCOMက ထုတ်ပြန်ပါတယ်။ နောက်ပြီး ဂျော်ဒန်မှာ အမေရိကန် တပ်ဖွဲ့ဝင်တွေကို တိုက်ခိုက်ခဲ့တဲ့ အီရန် အစ္စလာမ်မစ် တော်လှန်ရေး အစောင့်တပ် (IRGC)ကို ပြစ်ဒဏ်ခတ်ဖို့လည်း အခုနောက်ဆုံး တိုက်ခိုက်မှုတွေက ရည်ရွယ်ထားတယ်လို့ ဆိုပါတယ်။ အီရန်နဲ့ အမေရိကန်ကြားက အပစ်ရပ် သဘောတူညီမှုဟာ လုံးဝ ပျက်စီးသွားပြီလို့ ဆိုနိုင်ပြီး ပြီးခဲ့တဲ့ တစ်ပတ်အတွင်း အမေရိကန်ဟာ အီရန် ဆိပ်ကမ်းတွေ၊ ကမ်းရိုးတန်း ရေဒါစခန်းတွေ၊ ဒုံးကျည်နဲ့ ဒရုန်းပစ်စင်တွေအပြင် လမ်း၊ တံတား၊ လေဆိပ်စတဲ့ အခြေခံ အဆောက်အအုံတွေကိုပါ တိုက်ခိုက်လာခဲ့ပါတယ်။ တစ်ဖက်မှာလည်း အီရန်က ပင်လယ်ကွေ့ ဒေသတွင်း နိုင်ငံတွေမှာရှိတဲ့ အမေရိကန်စစ်တပ် ဖြန့်ကျက်တဲ့ နေရာတွေကို ပစ်မှတ်ထား လက်တုံ့ပြန်နေပါတယ်။ နောက်ထပ် တပ်ဖွဲ့ဝင်နှစ်ဦး ကျဆုံးကြောင်း အမေရိကန်ရဲ့ အတည်ပြု ထုတ်ပြန်ချက်ကြောင့် ဖေဖော်ဝါရီ ၂၈ ရက်နေ့မှာ စတင်တဲ့ အီရန်စစ်ပွဲနောက်ပိုင်း အမေရိကန်ရဲ့ စစ်သည် ဆုံးရှုံးမှု အရေအတွက်ဟာ ၁၆ ဦးထိ ရှိလာပြီ ဖြစ်ပါတယ်။ ပြီးတော့ ဒဏ်ရာရသူ ၄၃၀ လောက်ထိ ရှိခဲ့ပြီး အများစုကတော့ အီရန်ရဲ့ ဖောက်ခွဲရေး ဒရုန်းတွေဆီက ပေါက်ကွဲမှုလှိုင်းတွေ ဦးနှောက်ကို ထိခိုက် ရိုက်ခတ်တဲ့ဒဏ်ကို ခံခဲ့ရတာဖြစ်ကြောင်း သိရပါတယ်။ ===== ဗီယက်နမ်မှာ ရုတ်တရက် ရေကြီးမှုကြောင့် တစ်ရွာလုံးနီးပါး ပျက်စီး ဇူလိုင်လ- ၁၉ ၊၂၀၂၆ ။People’s Spring ဗီယက်နမ် မြောက်ပိုင်းမှာ မိုးသည်းသည်းထန်ထန် ရွာသွန်းမှုတွေကနေ ရုတ်တရက် ရေကြီးခဲ့တာကြောင့် တောင်ပေါ်ရွာလေး တစ်ခုလုံးနီးပါး ပျက်စီးခဲ့ပြီး အနည်းဆုံး လူ ၄ ဦး သေဆုံးခဲ့ပါတယ်။ ဗီယက်နမ် မြောက်ပိုင်းမှာရှိတဲ့ လိုင်ချူပြည်နယ်ထဲက မွမ်ထန်ရွာလေးထဲမှာ ဇူလိုင် ၁၇ ရက် မနက်အစောပိုင်းကစလို့ မိုးသည်းသည်းထန်ထန် ဆက်တိုက်ရွာသွန်းပြီး ရေကြီးခဲ့တာ ဖြစ်ပါတယ်။ အဲဒီနေ့က ဗီယက်နမ်ရဲ့ တချို့အစိတ်အပိုင်းတွေမှာလည်း မိုးသည်းထန်မှုတွေနဲ့ ဆက်စပ်ပြီး ၇ ဦးထက်မနည်း ဒဏ်ရာ ရခဲ့ပါတယ်။ မွမ်ထန်ရွာမှာတော့ ရုတ်တရက် ရေကြီးပြီး ရွာထဲက အိမ်တွေပါ ရေစီးနဲ့ မျောပါကုန်သလို အပျက်အစီးတွေလည်း စုပုံကုန်ပါတယ်။ ရွာထဲမှာ ၄ ဦးပြေီး ၄ ဦး ပျောက်ဆုံးနေကြောင်း ဗီယက်နမ် ကယ်ဆယ်ရေး အဖွဲ့တွေက ပြောပါတယ်။ ဖြစ်စဉ်နဲ့ ပတ်သက်လို့ သတင်းထုတ်ပြန်ခဲ့တဲ့ ဓာတ်ပုံမှာတော့ သစ်ပင်အကျိုးအပဲ့တွေ အမြောက်အမြား စုပုံနေတဲ့ နေရာနားမှာ ခါးလောက်နက်ပြီး အပြင်းအထန် စီးဆင်းနေဟန်ရှိတဲ့ ရေထဲဆင်း အလုပ်လုပ်နေတဲ့ ကယ်ဆယ်ရေး အဖွဲ့တွေကို တွေ့ခဲ့ရပါတယ်။ အရှေ့တောင်အာရှ ဒေသတွင်း နိုင်ငံတစ်ခုဖြစ်တဲ့ ဗီယက်နမ်ဟာ မိုးရာသီရောက်တိုင်း မုန်တိုင်းတိုက်ခတ်မှုတွေနဲ့ ရေကြီးမှုတွေဒဏ်ကို အပြင်းအထန် ခံစားရလေ့ ရှိပါတယ်။ အထူးသဖြင့် ဇူလိုင်ကနေ စက်တင်ဘာထိ အတောအတွင်း ကာလတွေမှာ ရေကြီးမှုတွေ ပိုကြုံရလေ့ ရှိပါတယ်။ အခုနှစ်အတွင်း အဓိကအားဖြင့် ရေကြီးတာ အပါအဝင် သဘာဝ ဘေးအန္တရာယ်တွေကြောင့် ဗီယက်နမ်မှာ သေဆုံးသူ ၄၈၉ ဦးထက်မနည်း ရှိခဲ့ပြီး ဖြစ်ပါတယ်။ ဇူလိုင် ၁၅ ရက်နေ့ကစလို့ ဗီယက်နမ်မှာ မိုးသည်းသည်းထန်ထန် ရွာသွန်းမှု နောက်ဆက်တွဲ မြေပြိုတာ၊ ရေကြီးတာတွေကြောင့် လမ်းတွေ ပျက်စီးတာ၊ ဓာတ်အား ပြတ်တောက်တာတွေ ဖြစ်ခဲ့သလို စိုက်ခင်းဧရိယာ ၂၃၈ ဟက်တာထက်မနည်း ရေမြုပ်ကုန်တယ်လို့ အစိုးရက ထုတ်ပြန်တဲ့ အချက်အလက်တွေအရ သိရပါတယ်။ ဗီယက်နမ် မိုးလေဝသ ဌာနက လာမယ့်ရက်ပိုင်းတွေအတွင်း၊ အထူးသဖြင့် နိုင်ငံမြောက်ပိုင်း ဒေသတွေမှာ ဆက်လက်ပြီး မိုးသည်းထန်နိုင်တယ်လို့ သတိပေး ကြေညာထားပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #အမေရိကန်အီရန်စစ်ပွဲ #အမေရိကန်တပ်ဖွဲ့ #အီရန်တိုက်ခိုက်မှု #ဂျော်ဒန် #အရှေ့အလယ်ပိုင်းပဋိပက္ခ #နိုင်ငံတကာသတင်း #USIranConflict #USMilitary #IranAttack #Jordan #CENTCOM #MiddleEastCrisis #WorldNews #ဗီယက်နမ်ရေကြီးမှု #ဗီယက်နမ်ရေဘေး #သဘာဝဘေးအန္တရာယ် #လိုင်ချူ #ရုတ်တရက်ရေကြီးမှု #နိုင်ငံတကာသတင်း #VietnamFloods #FlashFloods #Vietnam #LaiChau #NaturalDisaster #WorldNews