Vrasja e Jurgen Kurtit, autorët: Kur do marrim lekët?

Të tjera detaje janë zbardhur për vrasjen e 26-vjeçarit Jurgen Kurti në rrugën “Zef Jubani” në Tiranë. Pas arrestimit të 3 vrasësve me pagesë që morën pjesë në përndjekjen dhe ekzekutimin e menaxherit të VIP-ave, mësohet se është zbuluar edhe makina me të cilën ata kanë lëvizur. Nga këqyrja e kamerave të sigurisë në zonë policia ka ndjekur lëvizjet e 21-vjeçarit dhe të makinës dhe është parë se pas atentatit ata janë takuar. Pas identifikimit të personave ata janë vënë në përgjim. Nga përgjimi i bisedave të Elsi Leventit, Alesio Berberit dhe Olsi Qalliajt është zbuluar se shuma e paguar për vrasjen e Jurgen Kurtit ishte 30 mijë euro. Të rinjtë kanë folur në telefon për paratë që do të merrnin për “punën” e kryer. “Ke folur për ato lekët?, Kur do i marrim ato lekët?”, thuhej në bisedat e përgjuara mes tyre. Copyrighted by News24 Albania