ਗੀਤ - ਸੁਪਨੇ ਅਧੂਰੇ ਕਿਓਂ, ਲੈਰਿਕਸ - ਰਾਜਿੰਦਰਾ ਬਰਨਾਲਾ

ਲੈਰਿਕਸ - ਰਾਜਿੰਦਰਾ ਬਰਨਾਲਾ ਮਿਊਜ਼ਿਕ - Suno AI ਸੁਪਨੇ ਅਧੂਰੇ ਕਿਉਂ' ਸੁਪਨੇ ਅਧੂਰੇ ਕਿਓਂ, ਰਹਿਣ ਮਾਏ ਮੇਰੀਏ ਨੀ, ਸੀਨੇ ਵਿੱਚ ਉੱਠਦੇ ਉਬਾਲ। ਸੀਨੇ ਵਿੱਚ ਉੱਠਦੇ ਉਬਾਲ। ਮੁੱਢ ਤੋਂ ਲੈ ਅੱਜ ਤੱਕ, ਪਏ ਜਿਹੜੇ ਰੱਖਣੇ ਨੀ , ਬੇਚੈਨ ਨੀਂਦਾਂ 'ਚ ਸੰਭਾਲ। ਬੇਚੈਨ ਨੀਂਦਾਂ 'ਚ ਸੰਭਾਲ। ਹੁੰਦਾ ਸੀ ਮਨ ਬੜਾ, ਅਨਭੋਲ ਓਦੋਂ ਅੰਮੀਏ ਨੀ, ਹਾਂ ਸੀ ਜਦੋੰ ਨਿੱਕੜੀ ਨੀ ਬਾਲ। ਲਲਚਾਉਂਦਾ ਸੀ ਦੇਖ ਦੇਖ, ਖਿਡੌਣੇ ਮਹਿੰਗੇ ਮੁੱਲ ਦੇ ਨੀ, ਰੰਗ ਸੀ ਜਿਨ੍ਹਾਂ ਦੇ ਪੀਲੇ ਲਾਲ। ਲੀਰਾਂ ਦੀਆਂ ਗੁੱਡੀਆਂ ਦੇ, ਵਿਆਹ ਸੀ ਰਚਾ ਲੈਂਦੀ, ਭੁੱਲ ਸਾਰੇ ਹੋਰ ਨੀ ਖਿਆਲ । ਗੀਟੇ ਇੱਟਾਂ ਵੱਟਿਆਂ ਦੇ, ਵੱਡੀ ਸੀ ਨੀ ਪੂੰਜੀ ਹੁੰਦੀ, ਲਿਆਉਂਦੀ ਜਿਨ੍ਹਾਂ ਨੂੰ ਭਾਲ ਭਾਲ। ਸੀਨੇ ਵਿੱਚ ਉੱਠਦੇ ਉਬਾਲ। ਬਾਬਲੇ ਨੂੰ ਦੇਖਿਆ ਮੈਂ, ਮਿੱਟੀ ਵਿੱਚ ਮਿੱਟੀ ਹੁੰਦੇ, ਪਸੀਨੇ ਦੇ ਨੀ ਚੱਲਦੇ ਘੂਰ੍ਹਾਲ। ਦਿਨ ਰਾਤ ਇੱਕ ਕਰ, ਤੂੰ ਵੀ ਤਾਂ ਸੀ ਜੁਟੀ ਰਹਿੰਦੀ, ਉਲਝਣਾਂ ਦੇ ਲੱਦੇ ਸੀ ਹੁੰਦੇ ਵਾਲ। ਪਾ ਪਾ ਪੱਲੀਆਂ ਸੀ, ਓੜਨੇ ਬਣਾਉਂਦੀ ਮਾਏ, ਢਾਅ ਭੰਨ ਬੰਨ੍ਹ ਸੁੱਬ ਨਾਲ। ਬਣਾਉਂਦੀ ਸੀ ਬੰਨਤਾਂ ਤੂੰ, ਟੋਟੇ ਫੋਟੇ ਜੋੜ ਜੋੜ, ਸੀ ਤੇਰੇ ਹੱਥਾਂ ਦਾ ਕਮਾਲ। ਸੀਨੇ ਵਿੱਚ ਉੱਠਦੇ ਉਬਾਲ। ਫਿਕਰਾਂ ਦਾ,ਹੜ੍ਹ, ਅੱਖਾਂ ਤੇਰੀਆਂ 'ਚ ਦੇਖਦੀ ਸਾਂ, ਹੁੰਦੀ ਸਾਂ ਵੱਡੀ ਜਿਉਂ ਸਾਲੋ ਸਾਲ। ਚੰਦਰੇ ਜਮਾਨੇ ਤੋਂ, ਲੁਕੋ ਲੁਕੋ ਰੱਖਦੀ ਸੈਂ, ਹੋ ਨਾ ਜਾਏ ਜੀਣਾ ਨੀ ਮੁਹਾਲ। ਚੜ੍ਹਦੀ ਜਵਾਨੀ ਦੀਆਂ, ਅੱਥਰੀਆਂ ਸੱਧਰਾਂ ਨੀ, ਤਾਣ ਲਿਆ ਆਣਕੇ ਨੀ ਜਾਲ। ਚਾਦਰਾਂ ਸਰ੍ਹਾਣੇ ਅਤੇ, ਬਾਗ ਫੁਲਕਾਰੀਆਂ ਨੀ , ਚਾਈਂ ਚਾਈਂ ਕੱਢੇ ਨੀ ਰੁਮਾਲ। ਸੀਨੇ ਵਿੱਚ ਉੱਠਦੇ ਉਬਾਲ। ਰੁਲ ਖੁਲ ਰਹਿ ਗਏ ਚਾਅ , ਬੰਦ ਵਿੱਚ ਪੇਟੀਆਂ ਦੇ, ਲੰਘੇ ਕਈ ਹਾੜ੍ਹ ਤੇ ਸਿਆਲ। ਬਿਨਾਂ ਦਾਜ ਬਾਰੋਂ ਜਿੱਥੇ , ਉਠਾਈਆਂ ਨਾ ਜਾਣ ਧੀਆਂ , ਮੁੰਡਿਆਂ ਦਾ ਪੈਂਦਾ ਉੱਥੇ ਕਾਲ। ਸ਼ਰੇਆਮ ਲੱਗੇ ਜਿੱਥੇ, ਮੰਡੀ ਮਾਏ ਮੁੰਡਿਆਂ ਦੀ, ਬੋਲੀ ਤੇ ਵਿਕੇ ਨੀ ਜਿੱਥੇ ਮਾਲ । ਧੀਆਂ ਨੀ ਨਿਮਾਣੀਆਂ ਦਾ, ਰੱਬ ਹੀ ਨੀ ਰਾਖਾ ਉੱਥੇ, ਆਪੇ ਬਣ ਖੜੂ ਨੀ ਉਹ ਢਾਲ। ਆਪੇ ਬਣ ਖੜੂ ਨੀ ਉਹ ਢਾਲ। ਸੀਨੇ ਵਿੱਚ ਉੱਠਦੇ ਉਬਾਲ। ਸੁਪਨੇ ਅਧੂਰੇ ਕਿਉਂ, ਰਹਿਣ ਮਾਏ ਮੇਰੀਏ ਨੀ, ਸੀਨੇ ਵਿੱਚ ਉੱਠਦੇ ਉਬਾਲ । ਮੁੱਢ ਤੋਂ ਲੈ ਅੱਜ ਤੱਕ, ' ਜਿੰਦੇ' ਪਏ ਰੱਖਣੇ ਨੀ, ਬੇਚੈਨ ਨੀਂਦਾਂ 'ਚ ਸੰਭਾਲ । ਸੀਨੇ ਵਿੱਚ ਉੱਠਦੇ ਉਬਾਲ।