MACHIFU RUVUMA WAKANA KUMPA HECHE HADHI YA UCHIFU WA WANGONI

#habari Baada ya kusambaa mitandaoni habari za Makamu Mwenyekiti wa Chama cha Demokrasia na Maendeleo (CHADEMA) Tanzania Bara, ndugu John Heche, kupewa cheo cha uchifu wa kabila la Wangoni, Baraza la Wazee wa Mila pamoja na Machifu wa Mkoa wa Ruvuma wamekanusha kuhusika na tukio la kumvisha vazi la uchifu. Akizungumza na waandishi wa habari katika ofisi za Baraza la Mila zilizopo Manispaa ya Songea mkoani Ruvuma, Chifu Songea Mbano amezungumza kwa niaba ya Machifu wa mkoa wa Ruvuma, amesema kuwa wao kama machifu na wazee wa mila hawalitambui tukio la Makamu Mwenyekiti wa CHADEMA, ndugu John Heche, kuvalishwa mavazi ya kimila ya Kingoni tarehe 20 Juni 2026. Amesema kuwa tukio hilo lilifanywa na mwananchi mmoja, mcheza ngoma za asili anayefahamika kwa jina la Lusius Ponera, mkazi wa Mtaa wa Mshangano katika Manispaa ya Songea. Chifu Mbano ameeleza kuwa Ponera si chifu wala si mjumbe wa Baraza la Mila la Mkoa wa Ruvuma. Katika hatua nyingine, Chifu Songea Mbano amesema kuwa machifu wa Mkoa wa Ruvuma hawana mlengo wa chama chochote cha siasa na wanapinga mtu yeyote kuchukua jukumu au hadhi ya uchifu wakati si chifu halali. Aidha, amesema kuwa mtu hupewa hadhi ya uchifu kutokana na mchango wake kwa Taifa au kimataifa, na kwamba mchakato wa kumpatia hadhi hiyo lazima upitie Baraza la Machifu la Mkoa wa Ruvuma kwa mujibu wa taratibu za mila na desturi husika. #chivihimediaupdates