HUU HAPA MWONEKANO WA KIGOMA, UJENZI WA BARABARA UKIFIKIA ASILIMIA 83

Kamati ya Kudumu ya Bunge ya Uwekezaji wa Mitaji ya Umma imeeleza kuridhishwa na maendeleo ya ujenzi wa barabara ya Kabingo–Kasulu–Manyovu yenye urefu wa kilomita 260.6, ambao umefikia asilimia 83 ya utekelezaji. Barabara hii inayojengwa kwa awamu nne inagharimu Sh400 bilioni. Mwenyekiti wa Kamati hiyo, Augustine Vuma Hole amesema barabara hiyo yenye urefu wa kilomita 260.6 itakapokamilika itakuza uchumi wa mkoa wa Kigoma. Hole amebainisha hayo leo Jumanne, Machi 18, 2025, wakati kamati hiyo ilipopokea taarifa ya utekelezaji na kufanya ukaguzi wa barabara hiyo. Katika kikao hicho, Mbunge wa Kilwa Kaskazini (CCM), Francis Ndulane, alihoji kuhusu kuongezeka zaidi ya Sh80 milioni za gharana za ujenzi huo. Akijibu swali hilo, Naibu Katibu Mkuu wa Wizara ya Ujenzi, Dk Charles Msonde alisema ongezeko hilo limetokana na kipande cha barabara kilichokatika na kuharibiwa kutokana na mvua za El Niño.