Əlövsət Kərim, "Yaltaq" şeiri, səs: Furqani

"Yaltaq" Hiyləylə, təriflə adam aldadıb Tülküyə dönmüsən, a yaltaq insan! Saxta təbəssümün üzündə donub İnsan tək sönmüsən, a yaltaq insan! Təmiz ürəklini indi zəmanə Çox vaxt möhtac edir sən tək yamana, Yalanın odunda, olub pərvanə, Sağ ikən yanmısan, a yaltaq insan! Vicdanı yox olmuş bir havalısan, Toyda da, yasda da söz baqqalısan. Güya bu ellərin "ağ saqqalı"san, Eləmi sanmısan, a yaltaq insan? Güdürsən ovunu yavaş, ahəstə Min bir dona girib çatırsan qəsdə Tələyə saldığın hər könül üstə Quzğun tək qonmusan, a yaltaq insan! Yaxşı-pis çıxıbdır ətrafda adın Olubsan qənimi doğmanın, yadın, Tərif edə-edə baş aldatmağın Çəmini tapmısan, a yaltaq insan! Əlövsət Kərim