Агроөнеркәсіптің дамуына серпін берген PRO Молоко’26 форумы

Өскемен қаласында PRO Молоко’26 V форумы мен QazaqSut халықаралық көрмесі табысты өтті. Іс-шара ұйымдастырушы «АгроИндустрия KZ» компаниясының директоры Мұхамеджанов Нұрлан Мырзабекұлы көрменің басты мақсаты – сала мамандарының басын қосып, жаңа білім мен заманауи технологиялармен танысуға, сондай-ақ тәжірибе алмасуға мүмкіндік жасау екенін атап өтті. Оның айтуынша, көрмеге Қазақстанның түкпір-түкпірінен ғана емес, шетелдік компаниялар да белсенді қатысуда. Қатысушылардың іс-шараға берген бағасы жоғары, ал көрмеге қатысушылар саны жыл сайын артып келеді. Бұл – аталған алаңның сала үшін маңыздылығы мен беделінің артып келе жатқанын көрсетеді. Көрменің тағы бір ерекшелігі – оның еліміздің әртүрлі өңірлерінде ұйымдастырылуы. Соның арқасында ауыл шаруашылығының түрлі бағыттарында жұмыс істейтін компаниялар бір алаңда бас қосып, өз өнімдері мен технологияларын таныстырып, іскерлік байланыстар орнатады. Алдағы уақытта мұндай іс-шараларды тек сүт шаруашылығы бағытында ғана емес, ет өндірісі саласында да ұйымдастыру жоспарланып отыр. Бұл өз кезегінде агроөнеркәсіп кешенінің дамуына, инновациялық шешімдердің кеңінен енгізілуіне және халықаралық ынтымақтастықтың нығаюына оң ықпал етпек. Өз кезегінде «Промышленная микробиология» ЖШС бұл көрмеге жыл сайын тұрақты түрде қатысып келеді. Компания форумның жаңа серіктестер табуға, тәжірибе алмасуға және іскерлік байланыстарды кеңейтуге зор мүмкіндік беретінін атап өтіп, көрменің жұмысына өз үлесін қосып келеді.