【2036新西新世界 四通八達 鐵路1變3 免費高速公路1變3 羡煞全港】

今日係聖誕節，先祝各位聖誕快樂，亦為新界西人帶來交通好消息。 而家新界西嘅交通係點差法，大家心中有數。西鐵日日逼爆；兩條公路出巿區，大欖隧道要收錢，逼到個個都行屯門公路，塞車塞到訓醒一覺都仲係「原地踏步」，雖然政府2025年就會收返大欖隧道，但係好明顯都係唔夠，因為將來洪水橋、元朗南、錦田八鄉等等新發展地段，度度都話要加十幾廿萬人入去住，新界西人要出巿區必然係「無路可走」。 好消息係，我自2014年開始逼政府做嘅第五條跨海鐵路，政府已經嚟立法會攞咗錢做研究，走線亦跟足我建議。即係會連接屯門沿海地帶(包括小欖)北大嶼山、中部水域人工島，同埋港島北嘅傳統商業中心，以後就算深井人，坐7至10分鐘巴士小巴，都可以落小欖站上到車。用沙中線興建時間推算，2036年就會起好。 另一條鐵路係北環線，政府已經出晒文件話預計2034搞掂，將來新界西嘅人可以搭幾個站，就經古洞轉車去落馬洲，唔使好似而家咁荒謬，明明深圳關口好近，都要搭車落西九高鐵站，再駁返上去北面。 除咗鐵路，政府係2036年仲話會係藍地整個巨型交匯處，可以將同時會起好嘅十一號幹線、屯門西繞道，同埋大欖隧道(經元朗公路)駁通。走十一號幹線，可以直落北大嶼山公路，個度亦會有個大型交匯處，駁住連接昂船洲大橋嘅新橋，新橋會有分支落青衣。簡單嚟講，即係行十一號幹線，可以一路落到同北大嶼山公路嘅交匯處，然後經青嶼幹線或新橋去青衣、九龍，再去港島都得，比而家方便得多。東涌居民都唔使擔心，因為未來會有同北大嶼山公路平行嘅P1公路，連埋去大型交匯處，將來大家用青龍大橋北上、青嶼幹線去青衣，或者新橋去昂船洲大橋落九龍都無問題，真正做到三橋分流。 我已經同政府嚴肅要求，十一號幹線同新橋一定要一齊攞錢，同時起好，如果到時先話唔夠錢或者技術不可行，咁到時所有車塞死晒係青馬大橋，一定冧檔! 政府初步應承咗我會綑綁咁做，所以呢個項目係值得支持。 至於屯門西繞道，以前政府話會連港深西部公路同青田路，結果面對好多問題搞唔掂，而家新走線會由四通八達嘅藍地巨型交匯處做起點，避開屯門巿中心，直落屯門第40區，連住屯門赤鱲角連接路，落機場同北大嶼山都好快。提提大家，屯門赤鱲角連接路今個禮拜日會開通，連埋青嶼幹線都係免費行。 2036年，新界西1條鐵路變3條，兩條公路(1條收費)變3條免費，仲可以連住昂船洲大橋入九龍港島，你覺得新西到時會唔會羨煞全港？ #新界西 #交通 #田北辰