"1700 соодагер сыздап жатабыз"/ "Мадинадагы" чуу, президентке кайрылуу

Кыргызстандагы ири базарлардын бири "Мадинанын" соодагерлери "сыздап жатабыз" деп президент Садыр Жапаровго кайрылышты. Анткени аларга базар жетекчилиги менен мэрия билдирүү жөнөтүп 1-августка чейин соода жайларын бошотуп чыгып кетишин талап кылган. Альтернатива катары жанында курулган базардан жаңы орундары сатып алуу сунушталууда. Бирок соодагерлер ал жер өтө кымбат, тагыраагы 1 чарчы метри 3000 долларга жетерин, эгер ижарага турам десе чарчы метри 20дан 40 долларга чейин болорун айтууда. Мындай шартта сатып алса бир орун 200 миң доллардай, ижарага турса айына 150-200 миң сом төлөшү керектигин билдиришти. "Жакшынакай иштеп жаткан базардан бизди эмнеге сүрүп чыгарышат? Бизди ордубузда калтыргыла. Мында 1700 соодагер бар, ар бир жайда беш-алтыдан адам иштейт. Демек 10 миңдей адамдын тагдыры турат. Жаңы базарында шарттары дагы жок, мал сарайдай кылып эле куруп коюптур. Урматтуу президент, ишкерлерди колдойбуз деп ар дайым айтып келесиз. Биз дагы чакан ишкербиз, үнүбүздү угуп коюңуз. Жөндөн-жөн эле эмгегибизге күйүп жатабыз", — деп кайрылышты соодагерлер. Аларга мындай чечим күтүүсүз болгонун белгилешти. Анткени бирөө бир ай мурда эле 30 миң долларга контейнер сатып алган экен. Дагы бири эки жыл мурун 60 миңге алганын айтууда. "Бул жакты таштагыла да, чыккыла" деп жатат. Биз эмне кайра-кайра сатып алып эле жүрө беребизби? Жок дегенде ошол жактан орун берсин", — деп нааразы болушту. Мэрия жиберген билдирүүдө "Мадинада" оңдоп-түзөө жана курулуш иштери жүргүзүлөрү жазылган. Бирок базар канча убакытка жабылары көрсөтүлгөн эмес. 22-июлда калаа мэри Айбек Жунушалиев соодагерлер менен жолугуп алардын талаптары эске алынарын убадалаган. Бул боюнча комиссия да түзүлгөн.