MWELI AKARIBISHA UWEKEZAJI WA MATREKTA TANZANIA

‎ ‎#HABARI: Katibu Mkuu wa Wizara ya Kilimo, Bw. Gerald Mweli, ametembelea kiwanda cha kutengeneza matrekta cha MTW OJSC (Minsk Tractor Works) kilichopo katika Jamhuri ya Belarus, ikiwa ni sehemu ya ziara yake ya kikazi inayolenga kuimarisha ushirikiano wa kilimo na uwekezaji kati ya Tanzania na Belarus. ‎ ‎Kiwanda hicho ni miongoni mwa wazalishaji wakubwa wa matrekta na zana za kilimo, ikiwemo plau na haro, huku kikitengeneza matrekta yenye uwezo wa kuanzia farasi 15 hadi 500 kulingana na mahitaji ya wakulima wa ndani na wa kimataifa. ‎ ‎Mbali na uzalishaji wa matrekta, kampuni hiyo hutoa huduma za matengenezo baada ya mauzo, mafunzo kwa waendeshaji na mafundi wa matrekta pamoja na ushauri kuhusu matumizi bora ya zana za kilimo ili kuongeza tija katika uzalishaji. ‎ ‎Katika mazungumzo yake na uongozi wa kampuni hiyo, Bw. Mweli ameikaribisha MTW OJSC kuwekeza nchini Tanzania, akieleza kuwa nchi ina mazingira mazuri ya biashara na fursa kubwa ya soko kutokana na nafasi yake ya kimkakati ndani ya Jumuiya ya Afrika Mashariki (EAC), Jumuiya ya Maendeleo Kusini mwa Afrika (SADC) na Eneo Huru la Biashara la Afrika (AfCFTA). ‎ ‎Amesema uwekezaji wa kampuni hiyo nchini utasaidia kuongeza upatikanaji wa zana za kisasa za kilimo, kuchochea uzalishaji wa mazao, kuimarisha usalama wa chakula, kuongeza ajira na kukuza mauzo ya mazao nje ya nchi. ‎ ‎Bw. Mweli yuko nchini Belarus akimwakilisha Waziri wa Kilimo, Mhe. Daniel Chongolo, katika ziara ya kikazi inayolenga kuimarisha ushirikiano wa sekta ya kilimo kati ya Tanzania na Belarus, katika ziara hiyo, amepokelewa na Naibu Waziri wa Kilimo na Chakula wa Jamhuri ya Belarus, Mhe. Vitali Kulak.