Текширувчиларни ҳайдаб солган киракашларга иш очилди

Жорий йилнинг 1 март куни Наманган вилояти Косонсой туманида бир гуруҳ такси ҳайдовчилари текширишга келган икки ходимни ҳайдаб солди. Киракашларга кўра, текширувчилар ноқонуний равишда жарима ундирмоқчи бўлгани учун уларга қаршилик кўрсатишган. ИИБ киракашларга қарши иш очди. Воқеа 1 март куни соат 14:00ларда Косонсой тумани ҳудудида содир бўлган. Бу ҳақда Озодликка 4 март куни хабар йўллаган косонсойликка кўра, у воқеага гувоҳ бўлганлардан биридир. “Лицензия текширувчилари таксистларнинг жонига тегиб кетди. Жума куни иккитаси келиб, битта таксистни жарима қилмоқчи бўлди. Таксист йигит жонидан тўйганидан текширувчилардан бирини урди. Кейин ур-тўполон бўлиб кетди. Оломон текширувчиларни ўраб, олиб, уларни ҳайдаб юборди. Иккаласи битта машинада келган экан, машинасини ҳам пачоқ қилишди”, дейди воқеага гувоҳ бўлганини айтган косонсойлик. Яна бир косонсойлик такси ҳайдовчиси иддаосига кўра, текширувчилар киракашларни ноқонуний равишда жаримага тортмоқчи бўлгани жанжалга сабаб бўлган: “Текширувчилар ўзи фақат назорат қилиш учун чиқишган экан. Лекин лицензияси йўқ йигитларни жарима тўлайсан, деб ҳам мажбурлашган. Шу билан жанжал бошланган. Текширувчилар одамларни қон қақшатаяпти. Булар фақат одамларни талаш билан овора”, деди косонсойлик такси ҳайдовчиси. 5 март куни Озодлик текширувчилар ва такси ҳайдовчилари жанжалининг бир қисми акс этган видеони қўлга киритди.