AŞIQ XANIM GÖYÇƏLİ ÇIXIŞI

26 Noyabr - Azərbaycan Kəlağayı Günü münasibətilə Mədəniyyət Nazirliyinin dəstəyi, “Mirvarid Dilbazi” Poeziya Məclisi İctimai Birliyi və “Kəlağayı ev muzeyi”nin təşkilatçılığı ilə Rəşid Behbudov adına Dövlət Mahnı Teatrında “Kəlağayı bayramı” keçirilib. İctimai Birlikdən AZƏRTAC-a bildirilib ki, əvvəlcə Dövlət Himni səsləndirilib, şəhidlərin xatirəsi bir dəqiqəlik sükutla yad edilib. Tədbirdə çıxış edən “Mirvarid Dilbazi Poeziya Məclisi” İctimai Birliyinin sədri, “Kəlağayı ev muzeyi”nin direktoru Güllü Eldar Tomarlı milli-mədəni irsimizin təbliğindən geniş söz açıb, ilin müxtəlif dövrlərində məclisin təşkilatçılığı ilə ölkənin bir çox rayonlarında, eləcə də ölkə xaricində keçirilən tədbirlər, sərgilər və festivallar haqqında məlumat verib. O, kəlağayının UNESCO-nun Qeyri-maddi Mədəni İrs Siyahısına daxil edilməsinin bu sənətin beynəlxalq səviyyədə tanıdılmasına böyük töhfə verdiyini qeyd edib. Bayram proqramı “Kəlağayı ev muzeyi”nin qədim və müasir kəlağayı nümunələrindən, Güllü Eldar Tomarlının əl işlərindən, rəssam Gülnarə Məmmədovanın rəsm əsərlərindən, keçmişdən bu günə yol gələn milli dəyərlərimiz: sandıq, səhəng, cəhrə, nəhrə kimi məişət əşyalarının sərgisi ilə açılıb. Sərgidə həm ənənəvi ipəkçilik məktəbinə aid nümunələr, həm də müasir kəlağayı sənətinin yeni üslubları nümayiş olunub. Sərgidə toxuculuq ənənəsinin canlı nümayişi – cəhrə vasitəsilə yun, pambıq və ipək liflərin burularaq ipə çevrilməsi tamaşaçılar tərəfindən böyük maraqla izlənilib. Bu təqdimat xalq sənətinin unudulmaqda olan incəliklərinin yenidən yaddaşlara qaytarılması baxımından xüsusi önəm daşıyır. Tədbir çərçivəsində Güllü Eldar Tomarlının "Kəlağayı bayramı" və Brilyant Atəşin "Keçmişdən gələn yol" kəlağayı kitablarının təqdimatı keçirilib və gələn qonaqlara hədiyyə edilib. Daha sonra Mədəniyyət Nazirliyinin nümayəndəsi Heydər Mirzəyev və Xətai Rayon İcra Hakimiyyətinin şöbə müdiri Pənah İmanov çıxış edərək kəlağayının milli-mənəvi dəyərlərimizin mühüm tərkib hissəsi olduğunu vurğulayıblar. Xətai Rayon Ağsaqqallar Şurasının sədri, şəhid mayor Rüfət Əsgərovun atası Mürvət Əsgərov, şəhid Rəşad Quliyevin anası Mətanət xanım, itkin şəhid İsmayıl İsmayılovun bacısı, şair Lalə İsmayıl, eləcə də qazi Taleh Əliyev milli dəyərlərimizin və mədəniyyətimizin mühüm qollarından birini təşkil edən kəlağayının təbliğatı və təqdimatının keçirilməsinin əhəmiyyətindən danışıblar. Bildirilib ki, belə layihələr milli-mənəvi dəyərlərimizin yaşadılması, gələcək nəsillərə ötürülməsi və kəlağayı kimi mədəni irs nümunələrimizin cəmiyyətdə daha geniş tanıdılması baxımından mühüm rol oynayır. Tədbir bədii hissə ilə davam edib.