RC TANGA APONGEZA MRADI WA MIFUGO MRUAZI KUINUA VIJANA

Mkuu wa Mkoa wa Tanga, Mhe. Balozi Dkt. Batilda Burian, amewapongeza waendeshaji wa shamba la mifugo la Mruazi kwa juhudi zao za kuzalisha mitamba bora ya maziwa inayosaidia kuwainua wafugaji wadogo na vijana kiuchumi. Akizungumza wakati wa ziara yake katika shamba hilo lililopo wilayani Korogwe, Balozi Batilda amesema mradi huo unachangia kwa kiasi kikubwa kuongeza uzalishaji wa maziwa, ajira kwa vijana, na kukuza uchumi wa mkoa. Amesisitiza kuwa juhudi hizo zinaunga mkono maono ya Rais Dkt. Samia Suluhu Hassan ya kuwajengea vijana kesho iliyo bora kupitia sekta za uzalishaji. Ameeleza kuwa kupitia mradi huo, vijana wanapatiwa ardhi, nyumba na mifugo, hali inayowawezesha kuanza ufugaji wa kisasa na kurejesha mikopo kwa urahisi huku wakiongeza kipato chao. Balozi batilda amesisitiza kuwa Serikali ya Mkoa wa tanga itaendelea kushirikiana na taasisi mbalimbali zinazohusika na mradi huo kuhakikisha mafanikio ya mradi huo yanaongezeka na kuwanufaisha wananchi wengi zaidi. Kwa upande wake, msimamizi wa kitalu cha mfano katika shamba hilo, Selemani Mwedi, amesema walianza uzalishaji mwaka 2024 wakiwa na mitamba mitano pekee, lakini hadi sasa wamefanikiwa kuongeza idadi ya ng’ombe hadi kufikia nane pamoja na kuanza uzalishaji wa maziwa unaofikia lita 60 kwa siku. Ameongeza kuwa maendeleo hayo yamewasaidia kuanza kurejesha walioupata kwa ajili ya kuendesha shughuli hizo. Naye mhasibu wa shamba hilo, Rehema Shekimweli, amesema kampuni hiyo ilianza uwekezaji rasmi mwaka 2009 ikiwa na lengo la kuzalisha mitamba bora ya kisasa kwa ajili ya wafugaji wadogo. Ameeleza kuwa hadi sasa shamba lina uwezo wa kuzalisha mitamba 150 kwa mwaka, lita 900,000 za maziwa, pamoja na madume bora ya mbegu na nyama kwa ajili ya soko la ndani. Mradi huo unatarajiwa kupanuliwa zaidi ili kuwafikia vijana wengi zaidi, huku lengo likiwa ni kufikia vijana 100 watakaonufaika moja kwa moja na kuwa mfano wa wafugaji wa kisasa nchini.