മദ്യപാനവും ആരോഗ്യ പ്രശ്‌നങ്ങളൂം | Health Risks of Alcohol Use - Sandra Vincent

"തുടർച്ചയായ മദ്യപാനം ശാരീരികവും മാനസികവുമായ ആരോഗ്യപ്രശ്‌നങ്ങൾ പലരിലുമുണ്ടാക്കാറുണ്ട്. മദ്യത്തിന്റെ അമിതമായ ഉപയോഗം ശരീരത്തിലെ അവയവങ്ങളെ എങ്ങനെയെല്ലാം ബാധിക്കുമെന്നതിനെപ്പറ്റിയാണ് കൊച്ചി അമൃത ആശുപത്രിയിലെ ഡയറ്റീഷ്യനായ സാന്ദ്ര വിൻസന്റ് പ്രേക്ഷകരോട് വിശദീകരിക്കുന്നത്.കേരളത്തിൽ 18 വയസ്സ് തികയുന്നതിന് മുൻപ് തന്നെ ആൺകുട്ടികൾ മദ്യം രുചിച്ച് തുടങ്ങുന്നതായാണ് പഠനങ്ങൾ സൂചിപ്പിക്കുന്നത്. വല്ലപ്പോഴും ചെറിയ അളവിൽ മദ്യപാനം ആരംഭിക്കുന്ന യുവാക്കളിൽ പലരും പിന്നീട് തുടർച്ചയായ മദ്യപാനത്തിലൂടെ മദ്യാസക്തരായി മാറുന്നുണ്ട്. വെറും വയറ്റിൽ മദ്യപിക്കുമ്പോഴോ സോഡ പോലുള്ള പാനീയങ്ങൾ ചേർത്ത് മദ്യപിക്കുമ്പോഴോ മദ്യം വളരെ പെട്ടെന്നു തന്നെ ശരീരത്തിലേക്ക് ആഗിരണം ചെയ്യപ്പെടുന്നു. എന്നാൽ ഭക്ഷണത്തിന് ശേഷമാണ് മദ്യപിക്കുന്നതെങ്കിൽ മദ്യത്തിന്റെ ആഗിരണം വളരെ സാവധാനത്തിലാണ് സംഭവിക്കുക. സ്ത്രീയും പുരുഷനും ഒരേ അളവിൽ മദ്യപിച്ചാൽ സ്ത്രീശരീരത്തിലായിരിക്കും ബ്ലഡ് ആൽക്കഹോൾ തോത് കൂടുതലായി കാണപ്പെടുക. സ്ത്രീശരീരത്തിലെ സ്വാഭാവിക ജലാംശക്കുറവാണ് ഇതിന് കാരണം. മദ്യപിച്ച് കുറേ നേരത്തേക്ക് നമ്മുടെ ബ്ലഡ് ആൽക്കഹോൾ തോത് കൂടുതലായിരിക്കും. മദ്യപിക്കുമ്പോൾ നമ്മുടെ ആമാശയത്തിലെ ആസിഡ് ഉത്പാദനം കൂടുകയും അതുമൂലം വിശപ്പ് വർധിക്കുകയും ചെയ്യുന്നു. മദ്യത്തിന്റെ അമിതമായ ഉപയോഗം ഒരാളെ പലതരം രോഗാവസ്ഥകളിലേക്കാണ് നയിക്കുക." #Alcoholism #BingeDrinking #AmritaHospitals #ClinicalNutrition