ဆော်ဒီနဲ့ အမေရိကန် နျူကလီးယားစွမ်းအင် စာချုပ်ချုပ် | People's Spring

အမေရိကန်နဲ့ဆော်ဒီကြားနျူကလီးယား စွမ်းအင် စာချုပ်ချုပ်ဆို ဇူလိုင်-၂၃၊ ၂၀၂၆။ People’s Spring အမေရိကန်နဲ့ ဆော်ဒီအာရေးဘီးယား အစိုးရတွေဟာ နျူကလီးယား စွမ်းအင်ဆိုင်ရာ ပူးပေါင်းဆောင်ရွက်ရေး သဘောတူ စာချုပ်တစ်ရပ်ကို လက်မှတ်ရေးထိုးခဲ့ပါတယ်။ အရပ်ဖက် နျူကလီးယား ပူးပေါင်းဆောင်ရွက်ရေး သဘောတူညီချက် တစ်ခုလို့ ကြေညာထားတဲ့ စာချုပ်အရ ဆော်ဒီဟာ အရပ်ဖက် နျူကလီးယား စီမံကိန်းကို အကောင်အထည် ဖော်ခွင့် ရလာမှာ ဖြစ်ပါတယ်။ ဒေါ်လာ ဘီလီယံတွေနဲ့ချီ တန်ဖိုးရှိတဲ့ ပူးပေါင်းဆောင်ရွက်ရေး သဘောတူညီမှုအရ အမေရိကန် ကုမ္ပဏီတွေဟာ ဆော်ဒီရဲ့ နျူကလီးယား စွမ်းအင် စီမံကိန်းထဲမှာ ပိုပြီး ထဲထဲဝင်ဝင် မြှုပ်နှံခွင့်လည်း ရကြမှာ ဖြစ်ပါတယ်။ ငြိမ်းချမ်းစွာ အသုံးပြုဖို့ ရည်ရွယ်ထားတဲ့ နျူကလီးယား စွမ်းအင်ဆိုင်ရာ ပူးပေါင်းဆောင်ရွက်ရေး သဘောတူညီချက် တစ်ခုလို့ ကြေညာထားတဲ့ စာချုပ်ပါ အသေးစိတ် အချက်အလက်တွေကိုတော့ မထုတ်ပြန်ပါဘူး။ ဒါပေမဲ့ အမေရိကန် စွမ်းအင်ဝန်ကြီး ခရစ္စရိုက်နဲ့ ဆော်ဒီ စွမ်းအင်ဝန်ကြီး အက်ဘ်ဒူလာဇစ် ဘင်ဆယ်လ်မန်တို့ လက်မှတ်ရေးထိုးပြီး ဇူလိုင် ၂၂ ရက်နေ့မှာ ထုတ်ပြန်ခဲ့တဲ့ စာချုပ်အရ ဆော်ဒီဟာ အနာဂတ်မှာ ကိုယ်တိုင် ယူရေနီယမ် သန့်စင်ပိုင်ခွင့်လည်း ရလာမယ်လို့ သိရပါတယ်။ ယူရေနီယမ် သန့်စင်မှုဟာ နျူကလီးယား စွမ်းအင် ထုတ်လုပ်မှုမှာ လောင်စာအဖြစ် လိုအပ်သလို နျူကလီးယား ဗုံးတွေလည်း ပြုလုပ်နိုင်ပါတယ်။ အမေရိကန်က အာရပ်နိုင်ငံတစ်ခုကို ယူရေနီယမ် သန့်စင်ဖို့ ခွင့်ပြုတာဟာ ပထမဆုံးလို့ ယူဆရပြီး အခုကတည်းက တင်းမာမှုတွေ မြင့်တက်နေတဲ့ ဒေသထဲမှာ နျူကလီးယား လက်နက်ပြိုင်ဆိုင်မှု အလားအလာတွေကို မြင့်တက်လာစေနိုင်ကြောင်း ထောက်ပြမှုတွေလည်း ရှိနေပါတယ်။ အမေရိကန် စွမ်းအင်ဝန်ကြီးဌာနကတော့ နျူကလီးယား စွမ်းအင်ဆိုင်ရာ သဘောတူညီမှုနဲ့အတူ အပြန်အလှန် ထိန်းညှိကာကွယ်ရေး သဘောတူ စာချုပ် တစ်ရပ်ကိုပါ တစ်ပါတည်း လက်မှတ်ရေးထိုးခဲ့ကြောင်း ကြေညာထားပါတယ်။ ဆယ်စုနှစ်တွေနဲ့ချီ အချိန်ယူ ညှိနှိုင်းပြီး ဒေါ်လာ ဘီလီယံနဲ့ချီ တန်ဖိုးရှိမယ့် ပူးပေါင်း ဆောင်ရွက်မှုအတွက် နှစ်နိုင်ငံကြား နောက်ဆုံးမှာ သဘောတူညီမှု ရယူနိုင်ခဲ့ကြောင်း၊ ဒီသဘောတူညီချက်ဟာ နျူကလီးယားလက်နက် ထိန်းချုပ်ရေး အပါအဝင် စီးပွားရေးနဲ့ မဟာဗျူဟာ ရည်မှန်းချက်တချို့ ပြည့်မြောက်စေဖို့လည်း ရည်ရွယ်ထားကြောင်း ထုတ်ပြန်ချက်မှာ ပါရှိခဲ့ပါတယ်။ ==== ဟစ်တလာ မွေးခဲ့တဲ့အိမ်ကို ရဲစခန်းအဖြစ်ပြောင်းလဲဖွင့်လှစ် ဇူလိုင်-၂၃၊ ၂၀၂၆။ People’s Spring ဒုတိယ ကမ္ဘာစစ်မှာ နာမည်ဆိုးနဲ့ အထူးကျော်ကြားခဲ့တဲ့ နာဇီ ခေါင်းဆောင်ကြီး အဒေါ့ဖ်ဟစ်တလာ မွေးဖွားခဲ့တဲ့ နေရာဟာ အခုတော့ ရဲစခန်းတစ်ခု ဖြစ်လာခဲ့ပါပြီ။ နောင်တစ်ချိန်မှာ ဂျာမနီကို အုပ်စိုးတဲ့ နာဇီပါတီ အကြီးအကဲ ဖြစ်လာပေမယ့် ဟစ်တလာကို ဂျာမနီ နယ်စပ်နဲ့ ကပ်လျက် တည်ရှိရာ ဩစတြီးယား ပိုင်နက်ထဲက ဘရောင်နော် အမ်အင်းဆိုတဲ့ မြို့လေးမှာ မွေးဖွားခဲ့တာပါ။ အဲဒီ ရိုးရာအိမ်ဟောင်းလေးဟာ ပုဂ္ဂလိက ပိုင်ဆိုင်မှုအောက်မှာ ရှိနေခဲ့ပြီး မသန်စွမ်းသူတွေကို အကူအညီပေးနေတဲ့ ရန်ပုံငွေ အဖွဲ့အစည်း တစ်ခုက ရုံးခန်းအဖြစ် အသုံးပြုနေခဲ့ပါတယ်။ တစ်ဖက်မှာလည်း အဲဒီအဆောက်အအုံဟာ ခေတ်သစ် နာဇီဝါဒီတွေအတွက် အထွဋ်အမြတ်ထားရာ နေရာတစ်ခုလို ဖြစ်လာနိုင်တာကြောင့် ဖြိုချသင့်ကြောင်း ဝေဖန်မှုတွေ ထွက်ပေါ်ခဲ့ပြီး အဆောက်အအုံ တည်ရှိဖို့ သင့်မသင့် အငြင်းပွားစရာတွေ ဖြစ်နေခဲ့ပါတယ်။ ၂၀၁၇ ခုနှစ်မှာတော့ ဩစတြီးယား အစိုးရက လုပ်ပိုင်ခွင့်အာဏာ အသုံးပြုပြီး အဲဒီအိမ်ကို ဝယ်ယူခဲ့ပါတယ်။ ၂၀၁၉ မှာတော့ အိမ်ကို မွမ်းမံပြင်ဆင်ပြီး ရဲစခန်းအဖြစ် ပြောင်းလဲ ဖွင့်လှစ်မယ်လို့ အစိုးရက ကြေညာခဲ့ပါတယ်။ နောက်ပိုင်းမှာတော့ အိမ်တစ်အိမ်လုံးကို လုံးဝဥဿုံ မမှတ်မိနိုင်လောက်အောင် အကြီးအကျယ် ပြင်ဆင်ခဲ့ပြီး ခေတ်မီ အဆောက်အအုံတစ်ခု ဖြစ်လာစေခဲ့ပါတယ်။ အိမ်အစောင်းနဲ့ ပတ်သက်တာဆိုလို့ မော်သော်ဆန် ချွေးတပ်စခန်းကနေ ယူလာပြီး အိမ်ရှေ့ ပလက်ဖောင်းမှာ ထားရှိတဲ့ ‘ဖက်ဆစ်ဝါဒ ဘယ်တော့မှ ပြန်မရှင်သန်စေရဘူး’ဆိုတဲ့ စာတန်း ရေးထားတဲ့ ကျောက်တုံးကို အရင်အတိုင်း ချန်ထားတာ ဖြစ်ပါတယ်။ အိမ်ရဲ့ မျက်နှာစာမှာတော့ ‘ရဲ’ဆိုတဲ့ စာတန်းကိုပဲ ရိုးရိုးရှင်းရှင်း ရေးသားထားပါတယ်။ အဆောက်အအုံကို ဟစ်တလာနဲ့ ပတ်သက်ဆက်နွှယ်တဲ့ ပုံရိပ်တွေနဲ့ ဆက်စပ်မှုကနေ အပြီးတိုင် ဖယ်ရှားဖို့ ရည်ရွယ်ထားကြောင်း၊ ရဲစခန်းအဖြစ် ပြောင်းလဲ ဖွင့်လှစ်မှုက ခေတ်သစ် နီယိုနာဇီတွေက အဲဒီနေရာကို အလေးအမြတ် ထားစရာ နေရာတစ်ခုလို ပုံဖော်နေတာကို တားဆီးပြီးသား ဖြစ်သွားစေမယ်လို့ ယုံကြည်ကြောင်း ဩစတြီးယား ပြည်ထဲရေး ဝန်ကြီးရဲ့ သမိုင်းဌာနခွဲ အကြီးအကဲ စတီဖန် မဲလ်ဇော့ချ်က ပြောကြားသွားပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #အမေရိကန်ဆော်ဒီစာချုပ် #နျူကလီးယားစွမ်းအင် #နိုင်ငံတကာသတင်း #အမေရိကန်နှင့်ဆော်ဒီ #USSaudiDeal #NuclearEnergy #InternationalNews #USSaudiAgreement #CleanEnergy #ဟစ်တလာမွေးရပ်မြေ #ရဲစခန်း #နိုင်ငံတကာသတင်း #သမိုင်းဝင်နေရာ #HitlerBirthplace #PoliceStation #AustriaNews #HistoryUpdate #InternationalNews