ကုချိုင်ဖက်ထုပ် လုပ်နည်း Chive dumpling

ဖက်ထုပ်အရသာ မျိုးစုံရှိပေမယ့် ကြက်သွန်ဖြူကြက်သွန်မြိတ်နဲ့ လုပ်ထားတာကြောင့် ပိုမွှေးပြီး ပိုစားကောင်းပါတယ်။ ဖက်ထုပ်ထဲမှာ ထည့်တဲ့ အသားက မိမိစိတ်ကြိုက်အသားကို သုံးလို့ရပါတယ်။ ကြက်သားကိုသုံးရင် ပုစွန်အနည်းငယ်လေးရောပေးပါ။ ဝက်သားကို သုံးရင်တော့ အဆီအသား မျှတာလေးကို ရွေးပြီး သုံးတာက ပိုစားကောင်းပါတယ်ခင်ဗျာ။ ပထမဆုံး အသားတွေကို စက်နဲ့ ကြိတ် ဒါမှမဟုတ် နုတ်နုတ်စဉ်းထားပေးပါ။ ပြီးရင် ချင်း (ဂျင်း) လက်တဆစ်လောက်ကို ထောင်းထား သို့မဟုတ် ခြစ်ထားပေးပါ။ အသားတွေကို နယ်မှာ ဇလုံထဲမှာထည့်မယ်။ အရသာအတွက် ဆား.. အချိုမှုန့် ..ငရုတ်ကောင်းမှုန့် အဖြူ။ သကြား ကို မိမိထည့်မယ့် အချိုးအစားပေါ်မူတည်ပြီး ထည့်ပေးပါ။ ပြီးရင် နှမ်းဆီမွှေး - ၂ ဇွန်း (စားပွဲတင်ဇွန်း) နဲ့ ပဲငံပြာရည်အကြည် - ၂ ဇွန်း (စားပွဲတင်ဇွန်း) ထည့်ပါမယ်။ သတိထားပြီးထပ်ထည့်ရမှာက ရေ ပါ။ ရေကို စားပွဲတင်ဇွန်း ၃ ဇွန်းလောက်ထည့်ပါ။ ရေထည့်ပေးခြင်းအားဖြင့် ဖက်ထုပ်ပြုပ်ရဲ့ အသားတွေက မမာတော့ဘဲ ပိုပြီးစားကောင်းပါတယ်။ ပြီးမှ ခြစ်ထားတဲ့ ချင်း (ဂျင်း) ကိုထည့်မယ်။ သေချာနှံ့စပ်အောင်နယ်ပြီးပြီဆိုရင် ရေခဲသေတ္တာ အအေးခန်းထဲမှာ ၁ နာရီ သို့မဟုတ် တညလုံး နှပ်ထားပေးပါ။ ကြက်သွန်ဖြူကြက်သွန်မြိတ် (သို့) ကုချိုင်ကို ရေသေချာဆေး။ ရေစစ် ထားပေးပါ။ ရေစစ်ထားတာ ခြောက်သွားမှ အရွက်တွေကို နုတ်နုတ်စဉ်းပါ။ သတိထားရမှာက အရွက်ထဲမှာ ဆား မထည့်ရပါဘူး. ဆားထည့်တဲ့ အခါ အရွက်ထဲက ရည်တွေထွက်လာပြီး ဖက်ထုပ်ပြုတ်တဲ့အခါ ပေါက်သွားတတ်ပါတယ်။ အရွက်ထဲမှာ နှမ်းဆီမွှေး ၁ ဇွန်း (စားပွဲတင်ဇွန်း) ထည့်ပြီး နယ်ထားပေးပါ။ ပြီးမှ နှပ်ထားတဲ့ အသားတွေနဲ့လုံးလိုက်ရင် ဖက်ထုပ်ထဲက အဆာ ရပြီဖြစ်ပါတယ်။ ဖက်ထုပ်ထုပ်တဲ့အခါ ဖက်ထုပ်ရွက်တွေကပ်စေဖို့အတွက် ‌ဂျုံမှုန့် နဲ့ ရေကို ခပ်ပျစ်ပျစ်ဖျော်ထားပေးပါ။ ဖက်ထုပ်ရွက်ကိုတော့ ကျွန်တော်က အသင့် လုပ်ပြီးသားကို ပဲဝယ်သုံးထားပါတယ်။ ဖက်ထုပ် ထုပ်တဲ့အခါ အဆာတွေကို အများကြီးမထည့်ဘဲ သင့်တင့်ရုံပဲ ထည့်ပေးပါ။ (ဖက်ထုပ်ထုပ်နည်းကို စာနဲ့ရေးရတာခက်တဲ့အတွက် ဗီဒီယိုထဲမှာ အသေးစိတ်လုပ်ပြပေးထားပါတယ်ခင်ဗျာ) ဖက်ထုပ်ပြုတ်တဲ့အခါ ရေဆူဆူနဲ့ ပြုတ်တာမှန်ပေမည့် ရေဆူဆူနဲ့ တောက်လျောက်ပြုတ်ရင် ဖက်ထုပ်ထဲက အဆာတွေထွက်လာတတ်ပါတယ်။ ဒါကြောင့် ရေဆူလာပြီဆိုရင် ဖက်ထုပ်ထည့်မယ်။ ဖက်ထုပ်တွေ ရေပေါ်ပေါ်လာပြီဆိုရင် ရေအေး ကော်ဖီခွက်တဝက်လောက် ထည့်ပါ။ အဖုံးပိတ်ပြီး ရေဆူလာတဲ့အထိ ပြန်တည်ပါ။ ရေဆူလာရင် ရေအနည်းငယ် ထပ်ထည့်ပါ။ ရေဆူထိပြန်စောင့်ပါ။ ဖက်ထုပ်ပြုတ်ချိန်က စုစုပေါင်း ၈ မိနစ်လောက်ဆိုရပြီဖြစ်ပါတယ်ခင်ဗျာ။ ဖက်ထုပ်ကို ဆယ်ပြီး မိမိစိတ်ကြိုက်ဆော့စ်နဲ့ တွဲဖက်ပြီး သုံးဆောင်နိုင်ပါတယ်ခင်ဗျာ။ Cookfork1 ၏ အခြားသော လူမှုကွန်ယက်တွေဖြစ်တဲ့ ဖေ့စ်ဘုတ်။ အင်စတာဂရမ်။တစ်တော့ မှာလည်း မတူညီသော တင်ဆက်မှုများဖြင့် တင်ပေးထားပါတယ်ခင်ဗျာ။