Respublika üzrə ən yaxşı ibtidai sinif müəllimləri və məktəblər təltif olunub

Artıq 5-ci ildir ki, fəaliyyət göstərən İSİM layihəsi ibtidai təhsil sahəsində önəmli uğurlara imza atmaqdadır. Layihənin istiqamətlərindən biri də hər il ən yaxşı ibtidai sinif müəllimlərini və məktəbləri təltif etməkdir. Qaliblər İSİM layihəsinin hazırladığı unikal reytinq proqramı vasitəsilə, şagirdlərin inkişaf göstəricilərinə əsasən müəyyənləşir. Oktyabrın 5-də - Müəllimlər Günündə növbəti belə bir tədbir təşkil olunub. Təbdirdə 2024/2025-ci tədris ili üzrə ən yüksək reytinq balı toplamış müəllimlərə və məktəb rəhbərlərinə İSİM metodikasının müəllifi Samir Vəliyev tərəfindən diplom və xüsusi hazırlanmış kubok təqdim edilib. Respublika üzrə İlin məktəbi nominasiyasında 3-cü yeri Kürdəmir rayonu Atakişili kənd məktəbi, 2-ci yeri Xırdalan şəhər 5 nömrəli məktəb, 1-ci yeri isə Xaçmaz rayonu Köhnə Xaçmaz məktəbi tutub. Müəllimlərə gəldikdə isə Qubadan Çimnaz Almasova, Sumqayıtdan Sevinc Hacıyeva, Sabirabaddan Gülər Nəsirova, Xaçmazdan Xatirə Məmmədova, Göygöldən Aidə Əliyeva, Masallıdan Şəhla Nəzərova və Samuxdan Zülfiyyə Məmmədova “Respublika üzrə İlin müəllimi adını qazanıblar.