Pergjimet zbardhin lidhjet e Habilajt me policine

Përgjimet e autoriteteve italiane të grupit të trafikut të drogës që drejtohej nga Moisi Habilaj kanë zbuluar edhe mbështetjen që ai kishte në radhët e policisë së shtetit. Të paktën kjo lihet të kuptohet në një regjistrim ambiental që mban datën 6 maj 2015. Ajo është bërë në bordin e kësaj peshkarexhe të quajtur “Fatima” që përdorej nga dy italianët Rosario Giuliano dhe Giseppe Greco. Peshkarexha është ankoruar pranë Porto Palermos në orën 2 e 18 minuta të mëngjesit në pritje për tu ngarkuar me kanabis. Katër minuta më pas ka mbërritur Moisi Hajbilaj. Italianët që kanë parë një furgon policie të kalojë shprehin frikë por Habilaj i qetëson. “E pe furgonin e policisë që kaloi? Janë të gjithë tanët këtu. Por mund të ketë edhe ndonjë tradhtar nuk i dihet sepse nuk dihet kush dreqin vjen e kush ikën. Ne jemi të kompletuar, por del ndonjë bastard”. Më pas Habilaj dëgjohet që u jep udhëzime për itinerain që duhet të ndjekin dhe të mos hyjnë gabimisht në ujërat greke. “Këta janë tanët , rri i qetë si në shtëpinë tende. Një mik i mikut tim është në sallën operative në portin tjetër në kryeqytet më tha që që aty shohin gjithçka, edhe peshqit. Më mori në telefon dhe më tha se peshkarexha është futur për 1 milje në ujërat territoriale greke. Duhet të bëni kujdes, nuk duhet të hyni në ujërat greke”. Në këtë rast peshkarexha u ngarkua me 800 kilograme kanabis dhe 2 kallashnikove te cilet do te shiteshin ne Itali. Ajo u kap sapo mbërriti në ujërat italiane.