Мектеп мугалимдери 70 миллион сомдук курулушту сынга алышты

Нарын облусунун Жумгал районунун Баш-Кууганды айылындагы Шатман Садыбакасов атындагы орто мектебинин жаңы имараты үстүбүздөгү жылдын 1-сентябрында ачылып, пайдаланууга берилген. Ал мектептин тышындагы дубалдар бүгүнкү күндө тешилип, оюлуп, айрым курулуш шыбактары түшө баштаган. Бул тууралуу аймактык кабарчы билдирди. Мектептин жамааты убагында арзан материалдар менен курулуп, шашылыш эле бүткөн мектептин сапатына нааразы болуп чогулуп, аны курган компаниянын өкүлдөрүнө сын айтышты. Мектептин мугалими Доктурбек Иманалиевдин айтымында мектеп сапатсыз курулган. Учурунда курулушчуларга айтып жатып оозу тешилген. "Сапатсыз бүттү бул мектеп. Мектептин экинчи кабатка чыкчу тепкичти көрсөңөр эптеп эле, темирлери оркоюп чыгып калган, аларга кийимдер илинип, кооптуу болуп жатат. Жеринде калайлар, аларга буттары илинип чалынып жатышат. Спорт залдын артында суу толгон, дубалдары урап, тешилип калган. Эшиктеринин кармагычтары эпеп эле. Биз муну 10 жыл керек болсо элүү жыл күткөнбүз. Даартканага киргизген жокмун иштебесе кантип кигизем. Спорт залдын душуна жуунган окуучу жок. Ушуларды карап жакшы эле сапаттуу куруп беришпейт беле",- деди Д.Иманалиев.