Fernando Molina, unha vida entre árbores (1918-2020) (Labranza-TVG)

Fernando Molina Rodríguez, silvicultor e enxeñeiro de Montes, foi director do Centro de Investigación de Lourizán desde as súa creación na década dos 40 do século pasado ata a súa xubilación en 1985. En 1954 promoveu a creación da Escola de Capaces Forestais de Lourizán onde desenvolveu un método de ensino que hoxe en día inda segue sendo vangardista. En 1956 creou a rede meteorolóxica de Lourizán que cubría boa parte das áreas que quedaban fóra da rede do antigo Instituto Meteorolóxico Nacional. Silvicultor apaixoado, participou na fundación da Asociación Forestal de Galicia en 1986 e foi o seu presidente ata o ano 2000. En 2001 foi nomeado o seu presidente de honor. Defensor dos silvicultores, dos seus dereitos e da súa organización como grupo, participou na creación da Unión dos Silvicultores do Sur de Europa (USSE) e na Confederación de Organizacións de Selvicultores de España (COSE). O 1 de xullo de 2020 faleceu en Pontevedra aos 102 anos despois de dedicarlle a súa vida ao monte nos seus máis variados aspectos. O 19 de decembro de 2002 o programa Labranza da Televisión de Galicia emitiu este documental dirixido por Manuel Cruz no que se fai unha semblanza súa.