MINORENNI JSUQ FUQ PULIZIJA U JKAXKRU 400 METRU.

ONE.COM.MT • Ġurnata ta’ ħidma tal-Kuntistabbli tal-Pulizija mis-Sezzjoni tat-Traffiku, Simon Schembri spiċċat ħesrem hekk kif żagħżugħ ta’ sbatax-il sena saq għal fuqu u kaxkru għal madwar erba’ mitt metru. Il-Pulizija li għandu tmienja u erbgħin sena ġarrab ġrieħi serji f’diversi partijiet ta’ ġismu hekk kif tħalla mixħut taħt bankina fid-daħla taż-żona industrijali ta’ Ħal-Luqa. Wara operazzjoni li ħadet is-siegħat żviluppa li l-Kuntistabbli tilef il-parti ta’ idu mill-minkeb l-isfel. Filmat esklussiv li xxandar għall-ewwel darba fuq one.com.mt wera l-mument eżatt li fih allegatament ix-xufier jidher idawwar il-karozza u jerġ’a jmur lura sabiex ħareġ lill-Pulizija minn taħt il-vettura. Iż-żagħżugħ li mhux l-ewwel darba xellef difru mal-ġustizzja ġie arrestat ftit tal-ħin wara minn diversi membri tal-Pulizija fi Triq Ħal-Farruġ. Huwa ttieħed fil-Kwartieri Ġenerali tal-Pulizija għal aktar stħarriġ fejn fis-sigħat li ġejjin mistenni jitressaq il-Qorti mixli b’diversi akkużi.