Сайлауалды науқан

Ел басқаруға ниетті Жигули Дайрабаев Ұлттық компаниялардың отандық өндірісті қолдайтын кезі келді деп отыр. Яғни, енді ұлттық және квазимемлекеттік ұйымдар елде өндірілетін тауарларға басымдық беруге тиіс. Сол арқылы жеңіл өнеркәсіп саласын жаңғыртуға мүмкіндік болмақ. Қарақат Әбден Қызылордадағы штабының жұмысымен танысты. Кандидаттың ең алдымен сайлауалды штабына баруы бекер емес. Үміткер сайлаушылар жолдаған сұрақтарды оқып, ұсыныстарын білмек болыпты. Мәселен, Қарақат ханымның әлеуметтік салаға дем беруге бағытталған бағдарламасы көпшіліктің көңілінен шығып отыр. Себебі түскен сауалдардың дені дәл осы әлеуметтік сипаттағы сұрақтар екен. Қасым-Жомарт Тоқаевтың сайлауалды бағдарламасында жұмысшылардың құқықтарын қорғау және өндірістегі қауіпсіздікті арттыруға басымдық беріліп отыр. Өйткені әрбір қазақстандықтың адал еңбегі қорғалуы тиіс. Әрі соған лайықты еңбекақы төленуі қажет. Бүгін павлодарлықтармен жүздескен қоғамдық штаб мүшелері тұғырнаманың дәл осы бағытын түсіндірді. Салтанат Тұрсынбекованың пікірінше елдегі басшылық лауазымдардағы гендерлік өкілдіктің жағдайы мәз емес. Яғни, қыз-келіншектер ел халқының басым бөлігін құраса да, басшылық қызметтегі әйелдер саны өте аз екен. Әрі құзыреттілік жоқтығынан әйелдердің пікірі де ескерілмейді деді президенттікке үміткер. Нұрлан Әуесбаев депутаттар мен шенеуніктердің кіріс-шығысы туралы міндетті жария декларацияны шұғыл түрде енгізу қажет деп отыр. Әрі бұл тәртіп барлық деңгейдегі яғни, орталық және жергілікті билік өкілдеріне қатысты болуға тиіс. Бұл туралы оппозициялық партия атынан ұсынылған үміткер астаналық сайлаушылармен кездесуі кезінде айтты. Президенттікке үміткер Мейрам Қажыкен әлеуметтік мәселелерді жергілікті әкімдік шешуі керек дейді. Яғни, мектеп салу, аурухана жөндеу секілді проблемалар үшін елордаға барып, ақша сұраудың қажеті жоқ. Себебі салықтан түскен қаржының басым бөлігі өңірде қалып, халықтың мәселесін шешуге жұмсалуы тиіс екен. Бізді әлеуметтік желіде оқыңыздар: Youtube -   / @informburo31kanal   Facebook -   / informburo31   Instagram -   / informburo31   Vkontakte - https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31