Ijambo Sebarundi yashikirije abarundi rijanye n'imyaka 57 bahabuje intahe yo kwikukira

Ukwo umwaka utashe kw’igenekerezo rya 1 Mukakaro, abarundi bama bibuka igihe bahabuza intahe y’ukwikukira, bari baranyanzwe naba sesankuyoze aribo bakoroni, intahe abarundi bagwaniye barongowe n’umuganwa atari umugani Rudoviko RWAGASORE. Umukuru w’igihugu cacu c’Uburundi Nyenicubahiro Petero NKURUNZIZA, mu majambo yama yashikirije uko bukeye uko bwije, akaba rero adahengeshanya kwibutsa abarundi, kutanjanjwa kuriyo ntahe yo kwikukira bahabuje, na cane cane kuyiteramira ijoro n’umurango. Mu ntumbero yo guhimbaza imyaka 57 irangiye abarundi duhagurukanye ubugabo mu kwigobotora bakavamahanga, baducura bufuni na buhoro, Umukuru w’igihugu Nyenicubahiro Petero NKURUNZIZA, akaba rero yarashikirije ijambo abarundi, abarundikazi n’abakunzi b’Uburundi, ijambo rijanye n’uyo musi. Akaba yaragarutse ku bijanye n’ingene igihugu cacu c’Uburundi cari cubatse, imbere y’umuzo waba sesankuyoze, ingorane cagiye kiracamwo mu ntumbere yo gutahuza abarundi ivyo bariko baracamwo muri kino gihe, mu ntumbero yo gutegura Uburundi bwejo, buzoragwa abana, abuzukuru n’abuzukuruza.