MAAFISA AFYA CHATO WATATHMINI HALI YA AFYA NA KUKUMBUSHWA MAJUKUMU YAO YA KIUTUMISHI

Maafisa Afya Wilayani Chato walikutana katika kikao kazi kilichokuwa na lengo la kutathmini hali ya afya katika maeneo yao ya kazi na kukumbushana majukumu ya kiutumishi. Kikao hicho kilichofanyika katika ukumbi wa Halmashauri, kilihudhuriwa na maafisa afya kutoka kata na vituo mbalimbali vya afya waliowasilisha taarifa kuhusu hali ya afya ya wananchi pamoja na hatua zinazochukuliwa katika usimamizi wa usafi wa mazingira na udhibiti wa taka. Akizungumza katika kikao hicho, Afisa Utumishi wa Halmashauri ya Wilaya ya Chato, Ndg. Julius Method, aliwataka watumishi wa umma kuzingatia maadili, sheria, kanuni na taratibu za utumishi ili kuhakikisha wananchi wanapata huduma bora. Kwa upande wake, Afisa Afya wa Halmashauri ya Wilaya ya Chato, Bi. Fransisca Charles, aliwataka maafisa afya kuendelea kusimamia kikamilifu shughuli za afya katika maeneo yao na kuhamasisha wananchi kuzingatia usafi wa mazingira ili kujikinga na magonjwa mbalimbali yanayoweza kuzuilika.