Манай Гаригийн Залуус. Санаж яваарай киноны хэсгээс 1983 он.

1983 онд дорнын их найрагч Бэгзийн Явуухулангийн хүү Энхээ, төрийн шагналт Чойжилын Чимидийн хүү Энхээ нарын зохиолоор “Аль нь вэ” нэртэйгээр анх энэ кино одоогоос яг 43 жилийн өмнө бүтээгдэж байжээ. Кино зохиол бол үнэхээр маш сайхан зохиол болсон байсан гэдэг шүү. Жамъянсүрэнгийн Сэлэнгэсүрэн агсан ( түүний тоглосон хэсгийг зориуд оруулсан болно. 1:04 ) энэ зохиолыг гайхалтай сайн найруулж киногоо бүтээсэн боловч харамсалтайн тэр үеийн намын төв хорооны үзэл суртлын хэлтэсээс залуучуудад буруу үлгэр дуурайл үзүүлсэн байна, манай ирээдүй болсон залуучуудад аль нь бэ гэсэн олон салаа зам байх ёсгүй социализмаар явах ганц л зам бий гээд кино маань дахин задарч хэдэн сарын ажил болж бараг тал хувь нь хасагдаж байж сая нэг батлагдаж байжээ. Урлагийн Гавъяат Зүтгэлтэн , хөгжмийн зохиолч Гаадангийн Алтанхуяг гуай энэ кинонд аялгуут сайхан хөгжим бичиж Б. Бадрууган агсан Я. Оюундэлгэр нар дуулсан ч анхны дууны үг нь бас л тэр үеийн үзэл сурталд таарсангүй хасагдаж дууны хөгжим нь харин кинондоо дангаараа сүүлийн хэсэгт үлдсэн юм. Хасагдсан анхны дууны шүлэг нь харин ийм үгтэй байсан гэдэг. Сувдран гялтганах шинэ хотыг чиглээд Сүүгээ өргөсөн эхийн ерөөл шингэсэн Эх газрын түмэн замууд зурайж байна Ирээдүйд хөтлөх миний зам аль нь бэ Алсыг зорьсон олон замууд Амьдралд хөтлөсөн олон замууд Хүслийн жигүүр дэлгэрсэн Хүрэх замууд аль нь бэ … ( Одоо энэ шүлгийг аяанд нь орлуулаад дуулаад үзэхэд бас л сонирхолтой юм ) Хожим нь СТА Очирын Болдбаатар гуай яруу найрагч Гомбосүрэнгийн Баярхүү найзаараа энэ сайхан аялгуунд шүлэг бичүүлэн хань Н.Пүрвээтэйгээ хамтран дуулснаар та бидний сайн мэдэх Манай Гаригийн Залуус дуу мэндэлсэн юм. 2000 аад оны дундуур тэр үеийн манай шинэхэн нийтийн дуучид маань энэхүү бүтээлийг бултаараа тун чиг сайхан дуулсан байдаг билээ.