MENEJA RUWASA MATATANI KWA KUMDANGANYA MKUU WA MKOA PAUL MAKONDA|AOMBA RADHI MBELE YA WANANCHI

Meneja wa Wakala wa Maji na Usafi wa Mazingira Vijijin Wilaya ya Monduli Injinia Neville Msaki amemuomba radhi Mkuu wa Mkoa wa Arusha Mhe. Paul Christian Makonda mara baada ya kumdanganya kuhusu upatikanaji wa maji kwenye Kijiji cha Lendikinya Wilayani Monduli Mkoani Arusha. Kwenye Mkutano wa hadhara wa Mhe. Mkuu wa Mkoa Mjini Monduli, Meneja huyo alimueleza Mhe. Makonda kuhusu upatikanaji wa maji safi na salama kwenye kijiji hicho suala ambalo lilipingwa na Mwananchi mkazi wa kijiji hicho. Mwananchi huyo aliyekuwa kwenye mkutano wa hadhara mpaka majira ya usiku amemueleza Mkuu wa Mkoa kuwa mradi wa maji uliojengwa kwenye kijiji cha Lendikinya ukitumia zaidi ya Milioni 800 hautoi maji kwa Mwaka mzima sasa na bado mamlaka ya Maji imekuwa ikiwapa bili za maji zinazokadiriwa kufikia Milioni 1-2 kwa Mwezi. Mara baada ya kubanwa na maswali ya Mhe. Paul Christian Makonda, Mkuu wa Mkoa wa Arusha, Meneja huyo wa Mamlaka ya Maji alikiri kutotembelea mradi huo kwa takribani miezi mitano sasa na hivyo kutokufahamu lolote kuhusu maendeleo ya mradi huo wa maji. Mkuu wa Mkoa wa Arusha amekuwa akisisitiza kuuchukia uongo kutoka kwa Watumishi na watendaji wa Mkoa wa Arusha na ameapa kuchukua hatua kali za kinidhamu kwa yeyote atakayebainika kumdanganya hasa katika masuala ya kuwatumikia wananchi na kutimiza majukumu yao ya kiutumishi kwenye ngazi mbalimbali ndani ya Mkoa wa Arusha.