AEMMC Dietsche Aundacht - Daut Väarajcht een Voda to sennen - Psalmen 127 - Juni 21, 2026

Daut Väarajcht een Voda to sennen Psalmen 127 Juni 21, 2026 Gott wäld sikj Vodasch toom de Welt wiesen woo goot Gott wia. Wiels dit soo waut goodet wia haft de Soton daut von aule sieden aunjepakt un haft daut prooft to vedoawen. Hee haft aules jedonen waut mäajlich wia, daut Bilt rom to dreien un Vodasch äa Bilt to vedoawen. Oba Gott sien Plon wia een sea gooda! Hee haft de Welt jesäajent met Vodasch. Vondoag well wie seenen waut daut fa een Väarajcht es een Voda to sennen. Doa sent atelje besondre Säajnungen woone Gott blooss fa Vodasch jejäft haft, toom Biespell: • Hee haft Vodasch daut Väarajcht jejäft eene niee Jennerazion to belieren so daut dee woat dän rajchten Wajch gonen. • Hee haft Vodasch de Jeläajenheit jejäft derch äare Kjinja un Nokomenschoft noch fa väle Joaren nodäm daut se aul jestorwen sent eenen Enfluss to haben enne Welt. • Noch een Säajen es daut Vodasch kjennen doaderch en äa ieejnet Läwen waussen daut see äare Kjinja opptrakjen. Komt, well wie toop lieren waut daut fa een Väarajcht es, een Voda to sennen. Prädja Abe Harder