"हाम्रो सुनवल" मा यहाँहरूलाई हार्दिक स्वागत छ।

सुनवल नगरपालिकाको सहकार्य र सामुदायिक रेडियो दाउन्ने एफएम १०३.४ मेगाहर्जको उत्पादनमा तयार पारिएको कार्यक्रम "हाम्रो सुनवल" मा यहाँहरूलाई हार्दिक स्वागत छ। आजको कार्यक्रममा हामी पश्चिम नवलपरासीको सुनवल नगरपालिकाभित्र स्वास्थ्य क्षेत्रमा भएका महत्वपूर्ण गतिविधि, नागरिकलाई सहज र गुणस्तरीय स्वास्थ्य सेवा प्रदान गर्न निर्माण भइरहेका पूर्वाधार तथा सञ्चालनमा रहेका स्वास्थ्य संस्थाहरूका बारेमा जानकारी प्रस्तुत गर्दैछौँ। सुनवल नगरपालिका स्वास्थ्य सेवाको पहुँच विस्तार गर्दै नागरिकलाई आफ्नै नगरभित्र गुणस्तरीय उपचार उपलब्ध गराउने अभियानमा सक्रिय रूपमा अगाडि बढिरहेको छ। नगरपालिकाले प्राथमिक स्वास्थ्य सेवादेखि विशेषज्ञ सेवासम्मको पहुँच विस्तार गर्न विभिन्न कार्यक्रम सञ्चालन गरिरहेको छ। हाल नगरपालिकाभित्रका स्वास्थ्य चौकीहरूलाई थप व्यवस्थित बनाउने, सेवा विस्तार गर्ने तथा आवश्यक जनशक्ति र उपकरण व्यवस्थापन गर्ने कार्य भइरहेको छ। यसले स्थानीय नागरिकलाई आधारभूत स्वास्थ्य सेवाका लागि टाढा धाउनुपर्ने बाध्यता कम हुँदै गएको छ। सुनवल नगरपालिकाले दीर्घरोगी बिरामीहरूको सुविधाका लागि डायलाइसिस सेवा केन्द्र स्थापना गर्ने तयारीसमेत गरिरहेको छ। मिर्गौला रोगबाट पीडित बिरामीहरूले उपचारका लागि अन्य जिल्लासम्म पुग्नुपर्ने अवस्थालाई अन्त्य गर्न यो सेवा महत्वपूर्ण हुने अपेक्षा गरिएको छ।