P. KAGAME & FPR: ISHYANO KU BATUTSI N'ABANYAMULENGE

Kagame/FPR batera ibibazo bakigaragaza nk’igisubizo: baratera, bagasahura, bagasenya, bakica ariko bakigira abacunguzi. Ni ko byagenze mu Rwanda no muri Congo kandi ni ko bikomeje kugenda. No muri Jenoside bakomye imbarutso, bararebera, babuza ushaka gutabara wese. Ababaye muri FPR/APR barokotse Jenoside yakorewe Abatutsi, hamwe n’Abanyamulenge baratanga ubuhamya muri iki kiganiro. Generali Romeo Dallaire mu gitabo cye Shake Hands with the Devil yanditse agira ati: “Nta guca ku ruhande, nabwiye Kagame ko nta biganiro byigeze biba by’uko ingabo za UNAMIR zatabara hakoreshejwe imbaraga, ko ingabo zatabara zikoresha imbaraga niba zariho ziganirwaho, zari izo kuza gufasha mu guhagarika ubwicanyi, nyuma hakigwa ibyo guhagarika imirwano n’uko byashyirwa mu bikorwa. Ariko Kagame yanteye utwatsi ambaza ati: “LONI irareba uko yakohereza ingabo zo gutabara kubera iki? Abagomba gupfa barangije gupfa. Nihagira ingabo zoherezwa mu Rwanda tuzazirwanya. Nimureke ikibazo cy’Abanyarwanda tukikemurire”” (Urup. 342). Ku rundi rupapuro yanditse ibi: “Nta kubishidikanyaho, uruhare rwa mbere muri jenoside yabaye mu Rwanda ruri ku Banyarwanda bayiteguye, bayitegetse, bayiyoboye, bayishyize mu bikorwa. Ubuhezanguni bwabo, nk’uko bigaragara, ni umusaruro karundura, mubi cyane w’imyaka y’intambara zo kurwanira ubutegetsi n’imidugararo Abanyarwanda bakiniweho n’abari barabakolonije. Ariko impfu z’Abanyarwanda zishobora no gushyirwa ku mutwe wa Kagame, umuhanga ukomeye mu bya gisirikare, utihutishije urugamba igihe byari bimaze kugaragara ko hariho hakorwa jenoside. Yanambwiye inshuro nyinshi kandi ashize amanga igiciro Abatutsi benewabo bashoboraga kwishyura ngo intego yari igamijwe igerweho” (Urup. 515).