ලිබර්ටි ප්ලාසා එකට වලානෙන් බහී | වැටලීමට ආ නිලධාරීන්ට කෝටි 10ක අල්ලස් දෙන්නත් හදලා

කොල්ලුපිටිය නගර මධ්‍යයේ සුපිරි වෙළඳ සංකීර්ණයක් තුළ ඉදිකර තිබූ රහසිගත ගබඩාවක් තුළ සගවා තිබූ රුපියල් කෝටි දහයකට අධික වටිනාකමින් යුත් ස්මාර්ට් වර්ගයේ ජංගම දුරකථන තුන්සිය හතලිස් පහක් සමග එහි හිමිකරු (22) දා අත්අඩංගුවට ගත් බව වලාන මධ්‍යම දූෂණ මර්දන ප්‍රහාරක ඒකකය පවසයි. මෙම වැටලීම සිදුවන අවස්ථාවේදී එහි හිමිකරු විසින් පොලිස් නිලධාරීන්ට අල්ලස් වශයෙන් රුපියල් කෝටි දහයක් ලබාදීමට උත්සාහ දරා ඇති බව පොලීසිය කියයි. මෙසේ අත්අඩංගුවට ගෙන ඇත්තේ දෙහිවල ප්‍රදේශයේ පදිංචි (52) හැවිරිදි පුද්ගලයකු බව පොලිසිය කියයි. පොලිස් භාරයට ගත් මෙම ජංගම දුරකථන තොගය තීරු බදු නොගෙවා නීති විරෝධීව මෙරටට ආනයනය කළ සැම්සුන් සහ ඇපල් වර්ගයේ ජංගම දුරකථන 300 බව එම ඒකකය වැඩි දුරටත් කියයි. වලාන මධ්‍යම දූෂණ මර්දන ප්‍රහාරක ඒකකයේ ස්ථානාධිපති ප්‍රධාන පොලිස් පරීක්ෂක ඉන්දික වීරසිංහ මහතාට ලද තොරතුරක් අනුව කොල්ලු පිටිය නගර මධ්‍යයේ පිහිටි සුප්‍රසිද්ධ සුපිරි වෙළඳ සංකීර්ණයක පළමු මහලේ මෙම වැටලීම සිදු කර තිබුණි. එහිදී ජංගම දුරකථන තොගය සොයාගෙන ඇත්තේ එම වෙළඳ සංකීර්ණයේ වෙළඳසැලක් තුළ ඉතා රහසිගතව ඉදිකළ ගබඩාවක සඟවා තිබියදී බව පැවසේ. මෙම ජංගම දුරකථන එහි හිමිකරු විසින් ගුවන්තොටුපල හරහා ව්‍යාජ ලේඛන ඉදිරිපත් කොට ඉතා සූක්ෂමව විටින් විට මෙරටට ආනයනය කර ඇති අතර පසුව ඒවා තමන්ට අයත් විවිධ ප්‍රදේශවල පිහිටි ප්‍රදර්ශනාගාරවලට යවා අලෙවිකර ඇති බවට තොරතුරු අනාවරණය වී තිබේ. මෙම වංචාව නිසා රජයට අහිමිවූ බදු මුදල රුපියල් බිලියන ගණනක් වන බවට ගණන් බලා තිබේ.