Gəgəli kəndində Ömər Lahıci arxına su vurulmasına başlanmışdır

Ağsu rayonu Gəgəli kəndi Ağsu çayında suyun olmaması və Qazan arxının çay boğazında inşaat işlərinin başlanması səbəbindən uzun müddətdir ki, susuz qalmışdır. Ağsu rayonu İcra hakimiyyəti, Gəgəli bələdiyyəsi və Ağsu Suvarma Sistemləri İdarəsinin əməkdaşlığı nəticəsində Cavanşir su anbarına iri həcmli su motoru yerləşdirilmiş və Ömər Lahıci arxına su vurulmasına başlanmışdır. Lakin pərakəndəlik ucbatından suyun bərabər paylanması mümkün olmamış, narazılıq yaranmışdır. Gəgəli Bələdiyyəsinin 3 avqust 2021-ci il tarixli 15 saylı iclasında su məsələsi müzakirə olunmuş, "Ağsu rayonu Gəgəli bələdiyyəsi Təmiz Kənd" Məhdud Məsuliyyətli Cəmiyyətinin direktoru Həzi Həsənova tapşırıq verilmiş, Ağsu Suvarma Sistemləri İdarəsinin Gəgəli kəndi üzrə nümayəndəsi Balamirzə Vəliyevə dəstək olması bildirilmişdir. 4 avqust tarixində su motoru Cavanşir su anbarında daha irəli mövqedə yerləşdirilmiş, borular daha da uzadılmış, Ağsu Suvarma Sistemləri İdarəsi tərəfindən benzin ilə təmin edilmişdir. "Ağsu rayonu Gəgəli bələdiyyəsi Təmiz Kənd" Məhdud Məsuliyyətli Cəmiyyətinin işçiləri suyun Ömər Lahıci arxının Yasamal qobusuna qədər çatmasına nəzarət etmişlər. Su Yasamal qobusuna çatdıqdan sonra sahibkarlara öz kiçik ölçülü su motorları ilə həyətlərinə su vurulmasına imkan yaradılmışdır. Gəgəli bələdiyyəsi sakinləri, xüsusilə sahibkarları səbrli olmağa və suyun bundan sonra da davamlı axmasına dəstək verməyə çağırır.