Լողավազա՞ն, թե՞ շատրվաններ. ի՞նչ ապագա է սպասվում Վանաձորի քաղաքային լճին

Հուլիսի 17-ին Լոռու մարզպետի աշխատակազմում տեղի ունեցավ հանրային իրազեկման հանդիպում, որի ընթացքում ներկայացվեցին Վանաձորի Թումանյան և Կոմիտաս Վարդապետի՝ տրանսպորտային հանգույց հանդիսացող հրապարակների, ինչպես նաև քաղաքային լճի հիմնանորոգման և արդիականացման էսքիզային առաջարկները։ Հանդիպմանը մասնակցում էին Լոռու մարզպետի տեղակալ Ռուբեն Մարգարյանը, նախագծերի հեղինակ, ճարտարապետ Սուրեն Աբովյանը, մարզպետի աշխատակազմի և Վանաձորի համայնքապետարանի պատասխանատու պաշտոնյաներ, քաղաքացիներ և լրագրողներ։ Ներկայացնելով իր մշակած էսքիզները՝ Սուրեն Աբովյանը նշեց, որ Թումանյան հրապարակը նախատեսվում է ամբողջությամբ բարեկարգել։ Նախագծով նախատեսվում է տեղադրել ամենայն հայոց բանաստեղծ Հովհաննես Թումանյանի արձանը, ձևավորել ջրային ու կանաչ գոտիներ։ Ճարտարապետի խոսքով՝ նախագծման ընթացքում հաշվի է առնվել նաև հրապարակների ձևավորման միջազգային լավագույն փորձը։ Հանդիպման մասնակիցներին հետաքրքրում էր, թե արդյոք հրապարակը կծառայի նաև որպես հանգստի գոտի, ինչպես նաև՝ ինչ լուծումներ են նախատեսվում տարածքի մուտքի և ելքի կազմակերպման համար։ Նախագծով փոփոխություններ են նախատեսվում նաև Կոմիտաս Վարդապետի հրապարակում։ Այստեղ նախատեսվում է տեղադրել հայ երաժշտական ազգագրության հիմնադիր, մեծանուն կոմպոզիտոր Կոմիտասի արձանը, որի շուրջ կձևավորվեն ջրային և կանաչ գոտիներ՝ բարեկարգ տեսք հաղորդելով մարզկենտրոնի մուտք հանդիսացող Թումանյան փողոցի սկզբնամասին։ Արձանների վերջնական տեսքի վերաբերյալ, սակայն, դեռևս մշակումներ չկան։ Սուրեն Աբովյանի խոսքով՝ այդ նպատակով անհրաժեշտ կլինի կազմակերպել քանդակագործների բաց մրցույթ։ Հիմնանորոգման և արդիականացման ծրագրում ընդգրկված է նաև քաղաքային լիճը՝ հարակից տարածքով և Տանձուտ գետի տվյալ հատվածով։ Հիշեցնենք, որ այդ տարածքը վերջերս վերադարձվել է համայնքի տնօրինությանը։ Քաղաքային լճի համար ճարտարապետը մշակել է մի քանի էսքիզային տարբերակ։ Քննարկման ընթացքում հիմնական տարաձայնությունները վերաբերում էին տարածքի հետագա նպատակային օգտագործմանը։ Մի հատվածը առաջարկում էր վերականգնել լճի ավազանը՝ այն դարձնելով նաև լողալու համար պիտանի, իսկ մյուսները նախընտրում էին լճում ստեղծել շատրվանների համակարգ և ամբողջ տարածքը զարգացնել որպես հանգստի և զբոսանքի գոտի։ Հիշեցնենք, որ այս տարի դժվարությամբ կայացած Վանաձոր համայնքի ավագանու միակ նիստում հաստատվել էին մի շարք սուբվենցիոն ծրագրեր, որոնց թվում էին նաև վերը նշված երեք նախագծերը։ Սակայն քննարկման ընթացքում հարց բարձրացվեց, թե ինչ ընթացք է ունեցել դրանց իրականացումը։ Ներկաները նշեցին, որ ավագանու որոշումից հետո պետք է հայտարարվեր մրցույթ, իսկ նախագծանախահաշվային փաստաթղթերի փաթեթը մինչև մայիսի 20-ը ներկայացվեր Կառավարություն։ Քանի որ այդ քայլերը չեն իրականացվել, մասնակիցների գնահատմամբ՝ մինչև տարեվերջ շինարարական աշխատանքների մեկնարկի մասին խոսելը դժվար թե իրատեսական լինի։ Հանդիպման ընթացքում ներկաները հնարավորություն ունեցան մասնակիցներին ներկայացնելու նաև մի շարք այլ դիտարկումներ և առաջարկություններ, որոնք կքննարկվեն։ Քաղաքային լճի էսքիզային տարբերակները նախատեսվում է ներկայացնել նաև հանրային ավելի լայն քննարկման։