ስሜት አይታፈንም! ስሜት እንደመጣም አይለቀቀም!

ማንኛውም የስሜት ዓይነት ለሁሉ ሰው የተሰጠ ስጦታ ነው፡፡ ይህ ስሜት ለሁሉ የመሰጠቱ እውነታ ደግሞ ለአሉታዊዎቹም ሆነ ለአዎንታዊዎቹ ስሜቶች የሚሰራ እውነት ነው፡፡ መፍራት ባይኖር ማምለጥ የለም፣ መደንገጥ ባይኖር ለመጠንቀቅ መዘጋጀት የለም፡፡ Emotion (ስሜት) የሚለው የእንግሊዝኛው ቃል ከላቲንኛው ቋንቋ ያለው ስርና አመጣጡ “መንቀሳቀስ” የሚልን ሃሳብ የያዘ ነው፡፡ ስለዚህም፣ ስሜት የሚለው ቃል ወደ አንድ አቅጣጫ የመንቀሳቀስን ዝንባሌ ያመላክታል፡፡ ስሜት ካለ መንቀሳቀስና ተግባር አለ፡፡ ለምሳሌ ሳይንስ እንደሚነግረን በንዴት ጊዜ ደም ወደ እጅ መፍሰስ ይጀምራል፤ አንድን ነገር አንስቶ ንዴትን ተግባራዊ ለማድረግ ያዘጋጀናል፡፡ የልብ ትርታ ይጨምራል፣ ለተግባር ጉልበትን የሚሰጡ ኬሚካሎች በሰውነታችን መሰራጨት ይጀምራሉ፡፡ በፍርሃት ጊዜ ደም ወደ እግሮችና ወደ መሳሰሉት አካሎቻችን መጉረፍ ይጀምራል፤ ሸሽቶ ለማምለጥ ያዘጋጀናል፡፡ ደማችን ከፊታችን አካባቢ ሁሉ ቀንሶ ወደ እግር ስለሚሰራጭ ፊት ወደ “መቀዝቀዝ” ይለወጣል፡፡ ለጥቂት ጊዜ ሰውነት ይደነዝዛል፡፡ በዚህ ጊዜ ነው አእምሮአችን መደበቅ፣ ማምለጥ ወይም መጋፈጥ የሚሉትን ምርጫዎች በሰከንድ ውስጥ የሚወስነው:: የስሜት ብልህነት ያለው እዚህ ላይ ነው፡፡ ስሜትህ ሲመጣ አታፍነው፣ ተግባራዊም አታድርገው፡፡ ከዚህ ሁሉ ድርጊት በፊት ለየው፣ መንስኤውን እወቅ፣ መፍትሄ ፈልግለት፡፡ የግንቦት የንባብ challenge ሆኖ የቀረበላች መጽሐፍ ዋነኛ ዓላማ የስሜትን ብልህነት በሚገባ መተንተንና ተግባራዊ በማድረግ ለስኬታማነት መጠቀም ነው።