Մտահոգություններ ու հույսեր․ որտե՞ղ կիրացվի հայկական գյուղմթերքը

Հայաստանի գյուղերում այսօր հասունանում է ոչ միայն բերքը, այլև մտահոգությունը։ Ջերմոցներում ու այգիներում ամիսների աշխատանքը, ներդրված միջոցներն ու սպասումները հայտնվել են անորոշության ստվերում։ Հայկական գյուղմթերքի արտահանման հիմնական ուղղություններից մեկում՝ ռուսական շուկայում առաջացած սահմանափակումները լուրջ հարված են հասցրել բազմաթիվ տնտեսվարողների։ Լարսի անցակետից վերադարձող բեռնատարներում կուտակված չիրացված ծաղիկն ու ելակը գյուղացիների համար կենսական խնդիր են դարձել։ Քանի դեռ պետական կառույցները բանակցում են լուծումներ գտնելու շուրջ և խոսում նոր շուկաների ու աջակցության ծրագրերի մասին, գյուղերում մարդիկ փորձում են հասկանալ՝ ինչ ճակատագիր է սպասվում իրենց՝ տարիների աշխատանքով ստեղծած տնտեսություններին։ Հայաստանի բազմաթիվ գյուղերում մարդիկ իրենց ընտանիքների բարեկեցությունը կապել են հողի հետ։ Սակայն այսօր նրանցից շատերը կանգնած են անորոշության առաջ՝ մտահոգ իրենց արտադրանքի իրացման և եկամուտների ճակատագրով։ Տարիներով մեծ ներդրումներ են կատարել, սակայն այսօր կանգնած են լուրջ ֆինանսական խնդիրների առաջ։ Արտահանման հիմնական շուկայում՝ ռուսականում, սահմանափակումներ են մտցվել։ Գյուղմթերքով լի բեռնատարները վերադառնում են Լարսի անցակետից ։