Ministri Gonxhja: Mbetet sfidë menaxhimi i mbetjeve

Ministri i Turizmit, Kulturës dhe Sportit, Blendi Gonxhja, u ndal tek zhvillimi i turizmit në vend, duke theksuar se task-forca ndërinstitucionale ka nisur punën për koordinimin e masave gjatë sezonit turistik, me fokus menaxhimin e mbetjeve, pastërtinë e plazheve dhe monitorimin e shkarkimeve të paligjshme. Ai bëri apel për më shumë përgjegjshmëri qytetare në mbrojtjen e mjedisit, ndërsa nënvizoi se qeveria po përfundon investimet infrastrukturore dhe po punon për zhvillimin e një turizmi më cilësor e të qëndrueshëm. “Task-forca ndërinstitucionale që merret direkt me koordinimin mes institucioneve, agjencive, gjithë faktorëve, pushtetit vendor dhe pushtetit qendror, është mbledhur, ka filluar takimet e saj dhe është në detyrë për të gjitha aspektet që lidhen me menaxhimin dhe koordinimin. Natyrisht, problemet kryesore që ne trashëgojmë nuk lidhen vetëm me fuqinë apo mundësitë e shtetit, por edhe me sjelljen tonë ndaj mjedisit dhe kulturën tonë të mirëmbajtjes së tij. Këtu, kuptohet që kryefjalë janë plazhet. Problemi më i madh që ne trashëgojmë është pastërtia. Pra, mjedisi i pastër dhe trajtimi i mbetjeve. Natyrisht, ne kemi trashëguar dhe kemi ende problematika që lidhen me shkarkimet, shpesh të paligjshme, shpesh ende në zona ku nuk ka pasur një ndërhyrje që të ketë përfshirë zonën në rrjetin e kanalizimeve. Kuptohet që kjo është një Shqipëri që anembanë vendit ka projekte të shumta të zhvillimit infrastrukturor dhe që ndikojnë direkt në ato që ne sot kemi si disa prej zonave me pika të nxehta sa i takon shkarkimeve, të cilat rrjedhimisht janë problem. Kjo nuk është Shqipëria që duam për ne dhe për pushuesit tanë. Nuk duhet t’i hedhim mbeturinat në tokë. Kjo është shumë e rëndësishme. Nga ana tjetër, po punojmë për përmbylljen e të gjitha investimeve infrastrukturore, me ndikim edhe në sezonin veror. Kuptohet që sfida është shumë e madhe: sa më shumë turistë të kemi, aq më e madhe është sfida jonë për trajtimin e mbetjeve që ky turizëm sjell. Prandaj duhet të punohet me më shumë projekte, të cilat duhet të jenë integrale, shumë më të qëndrueshme, shumë më të plota dhe të përfshijnë brenda tyre resorte dhe pika pushimi. Duhet të përfshijnë brenda tyre të gjithë ciklin e trajtimit të gjithçkaje që lidhet me pushuesit, që të kemi një turizëm sa më të qëndrueshëm“, tha ai. Ministri cilësoi se fokusi i qeverisë nuk është turizmi elitar në “çmime”, por në cilësi. “Sfida është që të kemi jo një turizëm elitar në kuptimin e çmimeve. Sfida është që të bëjmë gjithçka mundemi që turizmi që konsumohet në Shqipëri të jetë cilësor, të gjenerojë të ardhura të tilla që të ardhurat në buxhetin e shtetit të jenë aq të larta sa të mund të përballojmë jo vetëm muajt pa fluks të lartë turizmi, por edhe që fluksi i turizmit të jetë sa më i përballueshëm dhe harmonik”, u shpreh ai. SUBSCRIBE to "RTV KLAN" on YouTube for more videos! Për më shumë informacione vizitoni faqen tonë web https://tvklan.al/kategoria/klan-news/ Follow Klan News on Facebook:   / klannews   Follow @klannews on Instagram:   / tvklannews   #KlanNews #KlanNewsLajme #TvKlan