NEW BAYAWAN CITY CENTRAL MARKET

Sa paglabay sa mga tuig, ang Dakbayan sa Bayawan nailhan na karon isip 1st Class Component City sa Negros Oriental, 25 ka tuig human kini nahimong siyudad. Uban sa padayon nga pag-uswag sa dakbayan, nagpadayon usab ang mga kalambuan nga atong nasaksihan gikan sa sentro hangtod sa kabukiran. Isip mga Bayawanon, adunay mga lugar nga nahimong parti na sa atong adlaw-adlaw nga kinabuhi ug parti sa atong pagdako dinhi sa atong pinalanggang siyudad. Usa niini mao ang kasamtangang Public Market, nga abli sa tanang mamalitay ug nagkalain-laing transaksyon gikan alas 4 sa kabuntagon hangtod alas 8 sa gabii. Ang kasaysayan sa kasamtangang Public Market nagsugod human sa usa ka sunog niadtong July 1992, diin ang pasilidad gitukod pag-usab. Sukad niadto, dako na ang kausaban sa Bayawan. Base sa datos, misaka og 39.35% ang populasyon sa siyudad gikan sa 90,953 niadtong 1995 ngadto sa 126,744 sa 2024, sumala sa PSA Census. Apan sulod sa kapin duha ka dekada, nagpabiling halos wala’y dakong kausaban sa sukod ug layout sa merkado, nga maoy hinungdan sa nagkalain-laing operational ug structural nga mga problema. Lakip niini ang: • Kakulang sa parking space alang sa mga sakyanan sa mga kustomer; • Siksikan nga arrangement sa mga stalls tungod sa limitadong lugar; • Limitado nga pasilidad sa sanitasyon ug utilities; ug • Pagtigum sa trapiko sa mga kadalanan nga naglibot sa kasamtangang Public Market. Kini nga mga hagit nakaapekto sa kahapsay sa adlaw-adlaw nga operasyon sa merkado ug sa kinatibuk-ang kasinatian sa mga mamalitay ug vendors. Gani, subay usab sa resulta sa survey nga gipahigayon sa City Planning and Development Office niadtong ikaduhang kwarter sa tuig 2023, diin ang mga respondents nagpahayag sa ilang panginahanglan alang sa mas maayong pasilidad. Giila usab nila nga importante ang presensya sa regular nga rota sa pampublikong sakyanan ug lapad nga mga dalan isip mga mahinungdanong aspeto sa usa ka publikong merkado. Isip tubag niini, ang LGU-Bayawan magtukod sa Bag-ong Public Market isip usa ka Local Economic Enterprise (LEE). Ang maong New Bayawan City Public Market motindog ug may kalapdon nga 33,100-square-meter sa luna nga gipanag-iya sa dakbayan. Diin kini usa ka modernong pasilidad nga adunay 462 ka stalls, structured zoning alang sa wet, dry, grocery, ug food sections, ug adunay kumpletong utilities. Ang maong lokasyon anaa sa Diversion Road, Barangay Poblacion, Dakbayan sa Bayawan, diin itukod ang City of Bayawan New Public Market. Kini mga 3 minutos lamang ang biyahe kung magsakay og sakyanan, o 10 minutos kung baktason gikan sa kasamtangang lokasyon sa Public Market. Kini nga lokasyon maayong napilian tungod kay dali kining maagian gikan sa mga dagkong dalan sa siyudad ug ideal sa adlaw-adlaw nga kalihokan sa merkado ug makatabang sa mas organisado nga dagan sa transportasyon ug trading activities. Ang maong konstruksyon nahiuyon usab sa Comprehensive Land Use Plan sa dakbayan, diin kini nga kalambuan parti sa expansion sa Central Business Center o aron mamenosan ang kahuot sa kasamtangang CBD ug public market area. Tumong usab niini ang paghatag og igo nga luna alang sa umaabot nga pagpalapad, ilabina sa nagkadaghang populasyon ug nagkadako nga mga kalihokan sa ekonomiya. Ang maong proyekto nagpakita usab sa proactive nga tubag sa dakbayan sa umaabot nga mga hagit, ilabi na sa pagdumala sa traffic congestion, nga usa sa kasagarang problema nga giatubang sa daghang siyudad. Sa kinatibuk-an, ang pagtukod sa Bag-ong Public Market usa ka estratehikong tubag sa dugay nang mga problema sa kasamtangang pasilidad. Kini nga proyekto dili lamang solusyon sa kahuot sa merkado, kondili usa usab ka dakong lakang padulong sa mas lig-on ug mas organisadong lokal nga ekonomiya ug usa ka paagi sa pagsiguro nga ang sunod nga henerasyon makaangkon og mas maayong siyudad kaysa sa atong nasinati karon. #bayawancity #ibayawbayawan #lgubayawan #news Facebook Page:   / ibayawbayawancity