MCN Economy- Ligji, shteti blen produkte bujqësore kur ka çrregullime

Ndërsa treguesit e sektorit të bujqësisë vijojnë të shënojnë rënie, Qeveria ka hedhur për konsultim publik një projektligj që parashikon ndërhyrjen e shtetit në rastet kur tregu përballet me çrregullime të rënda, kolaps të çmimeve, deformim të konkurrencës apo luhatje të forta të tregut. Projektligji i jep mundësi shtetit të blejë produkte bujqësore për të stabilizuar tregun dhe për të mbrojtur prodhuesit. Megjithatë, ekspertët vlerësojnë se ndërhyrja në momentet e krizës nuk mjafton, nëse nuk shoqërohet me politika të qëndrueshme mbështetëse për fermerët. Profesori i ekonomisë bujqësore, Gjok Vuksani, thotë se problemi kryesor nuk është mungesa e një mekanizmi ndërhyrjeje, por fakti që bujqësia shqiptare ndodhet prej vitesh në rënie të vazhdueshme. Ai thekson se nuk është kundër projektligjit, por e konsideron atë një masë që vepron vetëm pasi situata ka dalë jashtë kontrollit. Sipas Vuksanit, situata e vajit të ullirit është shembulli më i mirë i mungesës së politikave afatgjata. Edhe sipërmarrësi dhe kryetari i Shoqatës së Bimëve Aromatike dhe Medicinale, Filip Gjoka, shprehet në favor të çdo nisme që mbështet fermerët, por kritikon mungesën e konsultimit me grupet e interesit dhe ekspertët. Sipas tij, prioritet duhet të jetë rritja e mbështetjes direkte për prodhimin vendas. Në përfundim, Gjoka ngriti edhe shqetësimin për ndikimin e kursit të këmbimit në konkurueshmërinë e eksporteve shqiptare, veçanërisht për vajin e ullirit.