નડીયાદ: પ્રિ-મોન્સૂન કામગીરીનું ધારાસભ્ય પંકજભાઈ દેસાઈએ સ્થળ ઉપર જઇ કર્યું નિરીક્ષણ...

નડિયાદ શહેરમાં ચોમાસા પૂર્વે ચાલી રહેલી પ્રિ-મોન્સૂન કામગીરીની ચકાસણી માટે ધારાસભ્ય પંકજ દેસાઈ મેદાનમાં ઉતર્યા હતા. તેમની સાથે નવનિયુક્ત મેયર મનીષભાઈ પટેલ સ્ટેન્ડિંગ કમિટીના ચેરમેન પરાગ બ્રહ્મભટ્ટ તેમજ ડેપ્યુટી કમિશ્નર રુદ્રેશભાઈ હુદડ સહિત એન્જીનીયરો અને કોન્ટ્રાક્ટરો પણ ઉપસ્થિત રહ્યા હતા.નડિયાદ શહેરમાં વરસાદી પાણી ભરાવાની સમસ્યા દર વર્ષે નાગરિકો માટે મોટી તકલીફરૂપ બનતી હોવાથી મનપા દ્વારા મુખ્ય કાંસોની સાફ-સફાઈ યુદ્ધના ધોરણે હાથ ધરવામાં આવી છે. અત્યાર સુધીમાં કાંસોમાંથી 200 કરતાં વધુ ડમ્પર માટી કાઢવામાં આવી હોવાનું જાણવા મળ્યું છે, જ્યારે કુલ કામગીરીમાંથી અંદાજે 40 ટકા કામગીરી પૂર્ણ થઈ ચૂકી છે.ધારાસભ્ય પંકજભાઈ દેસાઈએ ગત વર્ષે પણ આ જ કાંસોની સફાઈનો મુદ્દો ઉઠાવ્યો હતો. ચોમાસા પહેલાં શહેરમાં પાણી ભરાવાની સમસ્યા ઘટાડવા માટે ચાલી રહેલી કામગીરીની તેમણે સમીક્ષા કરી હતી.આ પ્રસંગે ધારાસભ્ય અને મનપાની ટીમે મહિલા આર્ટ્સ કોલેજ નજીકનો કાંસ, માહિતી ખાતા ભવનની બાજુનો કાંસ, ખડવાસ વિસ્તારનો કાંસ, સરદાર ભવન પાછળનો કાંસ તેમજ સ્ટેશન રોડ ઉપર ચાલી રહેલી સફાઈ કામગીરીનું સ્થળ પર જઈ નિરીક્ષણ કર્યું હતું. મનપા દ્વારા વરસાદ પહેલાં તમામ મુખ્ય કાંસોની સફાઈ પૂર્ણ કરવાનો પ્રયાસ કરવામાં આવી રહ્યો છે.